“Sanqi Sur - Zəngəzurdan keçən yol...” sənədli filmi Qərbi Azərbaycanın saxtalaşdırılmış tarixinə bir cavabdır
Bakı, 29 noyabr, Göyçək Mahmudlu, AZƏRTAC
“Sanqi Sur - Zəngəzurdan keçən yol...” sənədli filmini böyük zövqlə izlədik. Məlum oldu ki, zəngi toponiminin coğrafiyası çox genişdir: Orta Asiya, Uzaq Şərq, həmçinin Yaxın Şərq, Azərbaycanın o taylı-bu taylı coğrafiyası, Qafqaz və s. Bu o deməkdir ki, zəngi toponimi tarixin ən qədim vaxtlarından bu günlərə qədər müxtəlif formalarda istifadə olunub, müxtəlif yer adlarına verilib. Bu gün həmin toponimlər bizim üçün yenidən gündəmə gəlib.
Bu sözləri AZƏRTAC-a müsahibəsində “Ortaq Dəyərlər” İctimai Birliyinin sədri Aqil Camal deyib.
Təşkilat sədrinin sözlərinə görə, hazırda Uzaq Şərqdən Avropaya qədər uzanacaq Orta Dəhlizin mühüm bir hissəsi olaraq Zəngəzur dəhlizinin açılması məsələsi bu anlayışın ən müxtəlif aspektlərdən araşdırılmasını da zəruri edir: “Hesab edirəm ki, bugünkü film də məhz həmin Zəngəzur dəhlizi ilə bağlı gedən prosesə töhfə verən tarixi aspektdən yanaşma baxımından önəmlidir. Bu həm də Qərbi Azərbaycanın saxtalaşdırılmış tarixinə bir cavabdır. Biz ermənilərlə bir coğrafiyada yerləşdiyimizə görə təkcə bizim yer adlarımıza deyil, məişətimizə, mətbəximizə, mədəniyyətimizə aid olan nümunələri də özününküləşdirmək istəyirlər. Artıq biz dəyərlərimizi tarixi sübutlarla təqdim edəndə faktlar qarşısında aciz qalırlar. Bu baxımdan zəngi toponimi ilə bağlı səsləndirilən yerli faktlar bunu deməyə əsas verir ki, Qərbi Azərbaycana ermənilər sonradan gəliblər”.
Bölmənin digər xəbərləri
