Şəhid ailələri və qazilər üçün növbəti iftar süfrəsi
Bakı, 19 aprel, AZƏRTAC
Aprelin 18-də “Dayaq” Vətən Müharibəsi Əlillərinə və Şəhid Ailələrinə Dəstək Təşkilatı tərəfindən “Benilüks” Azərbaycanlıları Konqresinin tərəfdaşlığı ilə Ramazan ayı münasibətilə şəhid ailələri və Vətən müharibəsi əlilləri üçün iftar süfrəsi təşkil edilib.
AZƏRTAC xəbər verir ki, əvvəlcə respublikamızın ərazi bütövlüyü şəhid olan qəhrəman Vətən övladlarının əziz xatirəsi bir dəqiqəlik sükutla yad edilib, Dövlət Himnimiz səsləndirilib.
Tədbirdə çıxış edən təşkilatın sədri Qalib Əliyev son üç ildə Azərbaycan xalqının Ramazan ayını Qələbə təntənəsi ilə qeyd etdiyini diqqətə çatdırıb: “Bir neçə il əvvələ qədər hər Ramazan ayında torpaqlarımızın işğaldan azad edilməsi üçün dualar edir, toplaşdığımız məclislərdə tezliklə bayramı azad Şuşada, Laçında, Kəlbəcərdə keçirməyi arzulayırdıq. Dualarımız 2020-ci ilin payızında 44 gün ərzində gerçəyə döndü. Müzəffər Ali Baş Komandan, Prezident İlham Əliyevin rəhbərliyi ilə Azərbaycan Ordusu 30 illik işğala son qoyaraq ölkəmizin ərazi bütövlüyünü bərpa etdi. Lakin unutmamalıyıq ki, şanlı Qələbə bizə asanlıqla başa gəlmədi. Şəhidlərimiz, qazilərimiz 44 səhifəlik Zəfər dastanına öz qanları, canları ilə adlarını həkk etdirdilər. Biz öz Qələbəmizi şəhidlərimizə, qazilərimizə borcluyuq. Alnımızı açıq, üzümüzü ağ edən qəhrəmanların yadigarlarını, qazilərimizi hər bir addımımızda, xoş günlərimizdə yad etmək hər birimizin mənəvi borcudur. Belə gözəl ayda dəyərli vətəndaşlarımızla bir araya gəlmək, iftar süfrəsi ətrafında əyləşmək bizim üçün də çox qürurvericidir. Azərbaycan xalqı öz qəhrəmanlarını unutmayacaq, onların misilsiz şücaətlərini nəsildən-nəslə ötürəcək. Əminəm ki, şəhidlərimizi özlərinə örnək götürəcək gənc nəsil arasından yeni Mübarizlər, Poladlar, Əliyarlar, Pəncəlilər, Mehrablar ortaya çıxacaq".
Milli Məclisin deputatı Vüqar İskəndərov bildirib ki, dövlətimiz şəhid ailələri və qazilərdən diqqətini əsirgəmir, onların sosial rifahının yaxşılaşdırılması istiqamətində müxtəlif islahatlar həyata keçirir: “Hazırda təkcə dövlət deyil, müxtəlif təşkilatlar, sıravi vətəndaşlar da şəhid ailələrinə, qazilərə müxtəlif vasitələrlə dəstəyini ifadə edir. Bu, onu göstərir ki, Vətən uğrunda canından keçənlər, onların əmanətləri, sağlamlığını itirənlər bu xalq üçün necə dəyərlidir. Şəhid anaları, ataları özləri də qəhrəmandırlar. Belə bir deyim var: “Uşaq evin güzgüsüdür”. Buradan belə məna çıxır ki, yalnız vətənpərvər analar, qorxmaz, cəsarətli atalar belə övladlar yetişdirə bilərdilər. Şəhidlərimiz nəinki öz valideynlərinin, həmçinin xalqımızın, ölkəmizin başını başqa millətlər, dövlətlər qarşısında uca etdilər. Bizim alnıaçıq, üzüağ gəzməyimizin səbəbkarı onlardır. Şəhidlərimizin əmanətlərini, qazilərimizi ziyarət etmək, onların problemlərinin həllinə kömək etmək hər birimizin borcudur. Elə oğullar yetişdirən valideynlərlə, döyüşdə can qoyub əzalarını itirən igid döyüşçülərimizlə bir arada olmaq bizim üçün də çox xoşdur. On bir ayın sultanı olan Ramazanda Allahdan şəhidlərimizə rəhmət, qazilərimizə şəfa, xalqımıza, dövlətimizə sülh, əmin-amanlıq diləyrik. Uca Yaradan ruzi-bərəkəti, sevinci, xoş günləri xalqımızdan əsirgəməsin".
Çıxışlardan sonra tədbir bədii hissə ilə davam edib. Həmçinin Ramazan ayının İslam dünyası üçün əhəmiyyətindən danışılıb, müqəddəs kitabımız olan Qurani-Kərimdən surələr oxunub, şəhidlərin ruhuna dualar edilib.
Bölmənin digər xəbərləri
