Şəhid ailələri ziyarət olunur
Göyçay , 26 sentyabr, Rəşad Türkoğlu, AZƏRTAC
27 sentyabr – Anım Gününün beşinci ildönümü ərəfəsində ölkəmizin ərazi bütövlüyü, suverenliyi və tarixi torpaqlarımızın azad edilməsi uğrunda gedən döyüşlərdə canından keçmiş qəhrəman oğullarımızın – Göyçay rayonunun Cəyirli kəndindən olan şəhid Ömərli Kənan Elxan oğlunun və Kürdəmiş kəndindən olan şəhid Mayılov Rüfət Bəhram oğlunun ailələri ziyarət edilib.
AZƏRTAC-ın bölgə müxbirinin verdiyi xəbərə görə, ziyarət zamanı Rayon İcra Hakimiyyətinin başçısı aparatının Vətən müharibəsi iştirakçıları və şəhid ailələri ilə işin təşkili şöbəsinin müdiri Elnur Həmidov, Cəyirli kənd inzibati ərazi dairəsi üzrə nümayəndəsi Vüsal Abbasov, rayon Ağsaqqallar Şurasının sədri Nazir Əhmədov və bələdiyyə sədri Elnur Əliyev şəhidlərin igidlik dolu ömür yolundan söz açıb, onların əziz xatirəsinin xalqımız tərəfindən hər zaman əziz tutulduğunu vurğulayıblar. Qeyd olunub ki, qəhrəman oğullarımızın şücaəti Vətən torpaqlarının azadlığına qovuşmasında mühüm rol oynayıb və onların hərb meydanındakı igidliyi gələcək nəsillərə örnəkdir.
Görüş zamanı şəhidlərin döyüş yoldaşlarının xatirələri də yada salınıb. Məlumat verilib ki, Kənan Ömərli daim ön sıralarda gedərək yoldaşlarına ruh yüksəkliyi bəxş edib, döyüş tapşırıqlarını cəsarətlə yerinə yetirib. Rüfət Mayılov isə qətiyyəti və qorxmazlığı ilə seçilib, döyüş meydanında göstərdiyi qəhrəmanlıqla silahdaşlarının yaddaşında unudulmaz iz qoyub.
Şəhid ailələrinin üzvləri onlara göstərilən diqqət və qayğıya görə ölkə Prezidentinə minnətdarlıqlarını bildiriblər.
Xatırladaq ki, şəhid Ömərli Kənan 08 mart 1999-cu ildə Göyçay rayonunun Cəyirli kəndində anadan olub. 29 sentyabr 2020-ci il tarixdə qismən səfərbərlik üzrə hərbi xidmətə cəlb edilib, 06 oktyabr 2020-ci il tarixdə Ağdam istiqamətində gedən döyüşlərdə qəhrəmancasına şəhid olub. Ölümündən sonra Azərbaycan Respublikası Prezidentinin sərəncamı ilə “Vətən uğrunda”, “Ağdamın azad olunmasına görə” medalları və 3-cü dərəcəli “Vətənə xidmətə görə” ordeni ilə təltif edilib.
Şəhid Mayılov Rüfət 31 yanvar 2001-ci ildə Göyçay rayonunun Kürdəmiş kəndində dünyaya göz açıb. 03 aprel 2019-cu ildə həqiqi hərbi xidmətə çağırılıb. Vətən müharibəsi zamanı qəhrəmanlıqla döyüşərək 30 sentyabr 2020-ci ildə Füzuli istiqamətində şəhidlik zirvəsinə ucalıb. Ölümündən sonra Azərbaycan Respublikası Prezidentinin sərəncamı ilə “Vətən uğrunda” və “Füzulinin azad olunmasına görə” medalları ilə təltif olunub.
Bölmənin digər xəbərləri
