Bakı, 28 sentyabr, AZƏRTAC

Vətən müharibəsi şəhidi Əfqan Nəsirova məxsus materiallar- hərbi köynək, təşəkkürnamə, Fəxri fərman, fotoşəkillər, medalların vəsiqəsinin surətləri, qol saatı Milli Azərbaycan Tarixi Muzeyinin Vətən müharibəsi fonduna daxil edilib.

Bu barədə AZƏRTAC-a muzeydən məlumat verilib. Bildirilib ki, şəhidə məxsus materiallar onun anası Kəmalə İsmayılova tərəfindən muzeyə təqdim olunub.

Əfqan Nəsirov 2001-ci ildə Sabunçu rayonu, Zabrat qəsəbəsində anadan olub. O, 2007-2018-ci illərdə Bakı şəhəri 71 nömrəli orta məktəbdə təhsil alıb və 2019-cu ildə Beyləqan rayonunda hərbi xidmətdə olub.

Əfqan Nəsirov Vətən müharibəsində iştirak edib, torpaqlarımızın işğaldan azad olunması naminə düşmənə qarşı döyüşlərdə igidlik və fədakarlıq nümunəsi göstərib və 2020-ci ilin oktyabrın ayında şəhidlik zirvəsinə ucalıb. “Vətən uğrunda”, “Füzulinin azad olunmasına görə”, “Cəsur döyüşçü” medalları ilə təltif olunub.