Serbiyada dəmiryolu vağzalındakı qəzaya görə daha iki məmur istefa verib
Belqrad, 21 noyabr, AZƏRTAC
Serbiyanın Novı Sad şəhərində dəmiryolu vağzalında 15 nəfərin öldüyü qəzaya görə daha iki məmur tutduğu vəzifədən istefa verib.
AZƏRTAC xəbər verir ki, daxili və xarici ticarət naziri Tomislav Momiroviç və Serbiyanın Dəmir Yolu İnfrastrukturunun direktoru Yelena Tanaskoviç istefa verdiklərini açıqlayıblar.
Qeyd edək ki, Serbiya Prezidenti Aleksandar Vuçiç ötən gün ictimaiyyətə müraciətində Novı Saddakı faciəyə görə hökumətdə və başqa yerlərdə istefalar gözlədiyini bildirmişdi.
Daha əvvəl isə Serbiyanın tikinti, nəqliyyat və infrastruktur naziri Qoran Vesiç tutduğu vəzifədən istefa verib.
Xatırladaq ki, noyabrın 1-də Novı Sad şəhərindəki dəmiryolu vağzalında stansiya binasının tavanının bir hissəsinin çökməsi nəticəsində 14 nəfər hadisə yerində həlak olub, ağır yaralılardan biri xəstəxanada dünyasını dəyişib, iki nəfərin isə müalicəsi davam edir.
Nihad Budaqov
AZƏRTAC-ın xüsusi müxbiri
Belqrad
Bölmənin digər xəbərləri
