Şərqşünaslıq İnstitutunda Xocalı faciəsinin qurbanları yad edilib
Bakı, 26 fevral, AZƏRTAC
Fevralın 26-da AMEA-nın akademik Ziya Bünyadov adına Şərqşünaslıq İnstitutunda “Xocalı qətliamı - XX əsrdə xalqımıza qarşı bəşəri cinayət” adlı tədbir keçirilib. Tədbirdə Xocalı faciəsinin qurbanlarının xatirəsi bir dəqiqəlik sükutla yad edilib.
Bu barədə AZƏRTAC-a Şərqşünaslıq İnstitutundan bildirilib. Tədbirdə AMEA-nın vitse-prezidenti, Şərqşünaslıq İnstitutunun direktoru akademik Gövhər Baxşəliyeva 33 il öncə Xocalıda erməni hərbi birləşmələrinin sovet ordusunun 366-cı motoatıcı alayının hərbi texnikasının iştirakı ilə azərbaycanlılara qarşı kütləvi qətliam və insanlığa qarşı zəmanəmizin ən dəhşətli cinayətlərindən birinin həyata keçirildiyini deyib. Xocalı soyqırımının ağır nəticələri barədə danışan akademik G.Baxşəliyeva xalqımızın bu günü böyük hüzn və kədərlə qeyd etdiyini söyləyib. O, Azərbaycan xalqına qarşı törədilmiş soyqırımının beynəlxalq səviyyədə tanıdılması və Xocalı faciəsi qurbanlarının əziz xatirəsinin əbədiləşdirilməsi məqsədilə Xocalı Soyqırımı Memorial Kompleksinin yaradılması haqqında Prezident İlham Əliyevin Sərəncam imzaladığını qeyd edib.
Tədbirdə çıxış edən institutun Şərq-Qərb şöbəsinin müdiri ilahiyyat üzrə fəlsəfə doktoru dosent Məmmədəli Babaşlı Xocalı faciəsinin ermənilərin dinc azərbaycanlı əhaliyə qarşı törətdikləri silsilə cinayətlərin ən dəhşətlisi olduğunu deyib. M.Babaşlı Xocalı soyqırımının təşkilatçılarının Ermənistan rəhbərliyi, birbaşa icraçılarının Ermənistan silahlı qüvvələrinin bölmələri, Qarabağdakı erməni terror dəstələri və keçmiş sovet ordusunun Xankəndi şəhərində yerləşən 366-cı motoatıcı alayının şəxsi heyətinin üzvləri olduğunu vurğulayıb. Şərqşünas alim Xocalı soyqırımı haqqında həqiqətlərin sistemli və məqsədyönlü şəkildə dünya ictimaiyyətinə çatdırılmasının əhəmiyyətini qeyd edib.
İnstitutun Asiya-Sakit okean regionu ölkələri şöbəsinin böyük elmi işçisi Sevinc Nuriyeva 33 il öncə fevralın 26-da Xocalının yerli əhalisi olan azərbaycanlılara qarşı dəhşətli soyqırımı həyata keçirildiyini, hadisə zamanı 63-ü uşaq, 106-sı qadın, 70-i qocalar olmaqla 613 nəfərin amansızcasına qətlə yetirildiyini qeyd edib. S.Nuriyeva Xocalı soyqırımının tanıdılmasının Azərbaycanın xarici siyasətinin əsas istiqamətlərindən olduğunu bildirib, indiyədək onu tanıyan ölkələr və ABŞ-ın ştatları barədə məlumat verib.
Şərqşünaslıq elminin tarixi və nəzəriyyəsi şöbəsinin aparıcı elmi işçisi, pedaqogika üzrə fəlsəfə doktoru Lalə Mikayılzadə erməni daşnak dəstələrinin dinc əhaliyə qarşı törətdikləri vəhşiliklər haqqında ətraflı danışaraq, erməni silahlı dəstələrinin bu hərəkətlərinin Cenevrə konvensiyasının, həmçinin Ümumdünya İnsan Haqları Bəyannaməsinin maddələrini kobud qaydada pozduğunu deyib.
L.Mikayılzadə 2023-cü il 19-20 sentyabrda aparılan lokal xarakterli antiterror tədbirləri nəticəsində Xocalı şəhərinin azad olunmasından, Azərbaycan Respublikasının Prezidenti İlham Əliyevin oktyabrın 15-də Xocalı şəhərində Azərbaycan Respublikasının Dövlət Bayrağını fəxrlə ucaltmasından da bəhs edib.
İnstitut əməkdaşlarından Adil Mirabdullayev və Orxan Nəcəfov çıxış edərək Xocalı soyqırımının bəşəriyyətin ən qanlı faciələrindən biri olduğunu deyiblər.
Bölmənin digər xəbərləri
