Si Cinpin Trampı Çinə səfərə dəvət edib
Vaşinqton, 5 iyun, AZƏRTAC
ABŞ Prezidenti Donald Trampla Çin Xalq Respublikasının sədri Si Cinpin arasında telefon danışığı olub.
AZƏRTAC-ın məlumatına görə, bu barədə açıqlama verən ABŞ Prezidenti telefon danışığı zamanı ticarət sazişi ilə bağlı bəzi incəliklərin müzakirə olunduğunu bildirib. Telefon danışığı təxminən bir saat yarım davam edib.
“Danışıq hər iki ölkə üçün çox müsbət nəticələndi. Müvafiq komandalarımız tezliklə toplantı yerini müəyyənləşdirəcəklər.
Bizi xəzinədarlıq katibi Skott Bessent, ticarət katibi Hovard Lutnik və ABŞ-ın ticarət nümayəndəsi Ceymison Qrir təmsil edəcək. Söhbət zamanı Sədr Si nəzakətlə birinci xanımı və məni Çinə səfərə dəvət etdi və mən də buna qarşılıq verdim. İki böyük millətin prezidentləri olaraq, bunu hər ikimiz səbirsizliklə gözləyirik. Söhbət demək olar ki, tamamilə ticarətlə bağlı oldu. Yaxın vaxtlarda keçiriləcək görüşün vaxtı və yeri barədə məlumat verəcəyik”, - deyə o əlavə edib.
Məlahət Nəcəfova
AZƏRTAC-ın xüsusi müxbiri
Vaşinqton
Bölmənin digər xəbərləri
