Silahlı qüvvələrdə Dövlət Bayrağı Günü təntənə ilə qeyd olunur
Bakı, 9 noyabr, AZƏRTAC
Azərbaycanın müdafiə naziri general-polkovnik Zakir Həsənovun təsdiq etdiyi tədbirlər planına əsasən, Əlahiddə Ümumqoşun Ordusunda, birlik, birləşmə, hərbi hissə və xüsusi təyinatlı təhsil müəssisələrində 9 noyabr - Dövlət Bayrağı Günü ilə bağlı silsilə tədbirlər həyata keçirilir.
Müdafiə Nazirliyinin mətbuat xidmətindən AZƏRTAC-a bildiriblər ki, Şəmkir Olimpiya İdman Kompleksində Şəmkir hərbi birliyinin, rayon icra hakimiyyətinin və Gəncə Qarnizonu Zabitlər Evinin birgə təşkilatçılığı ilə Dövlət Bayrağı Gününə həsr olunan bayram tədbiri keçirilib.
Tədbirdə Şəmkir Rayon İcra Hakimiyyətinin və ictimaiyyətin nümayəndələri iştirak ediblər. Əvvəlcə bayraq gününə həsr olunmuş videoçarx nümayiş olunub. Çıxış edənlər ölkəmizdə dövlət rəmzlərinə, o cümlədən bayrağa böyük hörmət və sevgi bəslənildiyini xüsusi qeyd ediblər.
Azərbaycanın Milli Qəhrəmanı, general-leytenant Rövşən Əkbərov hərbi xidmətdə fərqlənən əsgərləri və müharibə veteranlarını bayram münasibətilə təbrik edərək onları xüsusi hədiyyə ilə mükafatlandırıb.
Tədbirdə Azərbaycanın Xalq Artisti Azərin, Zümrüd Tağıyeva, “Vətən uğrunda!” hərbi-vətənpərvərlik mahnı müsabiqəsinin finalçıları Sabir Əliyev, Rəşad İsmayıl və hərbi orkestrlə Elnur Abbasov konsert proqramı ilə çıxış ediblər. Gəncə Qarnizonu Zabitlər Evinin hərbi teatr kollektivinin hazırladığı “Ayağa dur, Azərbaycan!” adlı kompozisiya və “N” saylı hərbi hissənin kəşfiyyat qrupunun nümunəvi çıxışı tədbir iştirakçılarının böyük marağına səbəb olub.
Dövlət Bayrağı Gününə həsr olunan bayram tədbiri atəşfəşanlıqla sona çatıb.
X X X
Cəmşid Naxçıvanski adına Hərbi Liseydə Dövlət Bayrağı Gününə həsr olunmuş tədbir keçirilib.
Tədbirdə hərbi lisey rəisinin şəxsi heyətlə iş üzrə müavini polkovnik Rəhim Səmədov çıxış edib.
Əvvəlcə ulu öndər Heydər Əliyevin və şəhidlərin ruhu bir dəqiqəlik sükutla yad edilib və dövlət himni ifa olunub.
Sonra kursantlar iştirakçılara dövlət bayrağı haqqında geniş məlumat verib, bayraq haqqında şeirlər səsləndiriblər.
Tədbirdə iştirak edən Azərbaycan Respublikası Həmkarlar İttifaqları Konfederasiyasının mütəxəssisi Xoşqədəm Bağırova liseyin ictimai həyatında fəal iştirak edən və 2014-2015-ci təhsil ilinin nəticələrinə görə tədrisdə və intizamda fərqlənən kursantlara diplom və qiymətli hədiyyələr təqdim edib.
Tədbir Azərbaycan Dövlət Mədəniyyət və İncəsənət Universitetinin tələbələrinin vətənpərvərlik ruhunda musiqi nömrələri ilə davam etdirilib.
X X X
Bayram münasibətilə Hərbi Polis İdarəsinin bir qrup şəxsi heyəti də Dövlət Bayrağı Muzeyində olub. Muzeyin direktor müavini Samir Hüseynov hərbiçiləri burada sərgilənən eksponatlarla tanış edib. Bildirilib ki, azərbaycanlı memarların və dizaynerlərin layihələri əsasında qurulan, tərtibatında müasir dizayn texnologiyalarından istifadə olunan muzeydə müxtəlif dövrlərdə Azərbaycan ərazisində mövcud olmuş dövlətlərin, xanlıqların, o cümlədən İrəvan xanlığının bayraqları nümayiş olunur. Burada, həmçinin XVII-XVIII əsrlərə aid bayraqların elementləri, gerblər, Azərbaycan Respublikasının müxtəlif illərdə qəbul olunmuş Konstitusiya broşürləri də vardır. Muzeydə poçt markaları, pul nişanlarının nümunələri, orden və medallar, ulu öndər Heydər Əliyevin rəhbərliyi ilə müstəqil Azərbaycan dövlətinin yaranması, formalaşması və inkişafını, Prezident İlham Əliyevin ölkəmizin tərəqqisi ilə bağlı fəaliyyətini əks etdirən çoxsaylı fotolar və sənədlər nümayiş etdirilir.
Hərbi qulluqçular Silahlı Qüvvələrin Ali Baş Komandanının bayrağı, müxtəlif qoşun növlərinin döyüş bayraqları və mərasim geyimləri ilə tanış olublar.
Dünyanın nadir muzeylərindən biri olan Dövlət Bayrağı Muzeyində, həmçinin Ginnes dünya rekordları təşkilatının Azərbaycanın dövlət bayrağı dirəyinin dünyada ən hündür bayraq dirəyi olduğunu təsdiq edən sertifikatı, müxtəlif kitablar, fotoşəkillər, 1918-1920-ci illərdə Azərbaycan Xalq Cümhuriyyətinin Türkiyədəki səfirliyinin binası üzərində dalğalanmış bayraq da nümayiş olunur. Buradakı eksponatların çoxu ilk dəfə nümayiş etdirilir.
Hərbi qulluqçular Dövlət Bayrağı Muzeyindən zəngin təəssüratlarla ayrılıblar.
Bölmənin digər xəbərləri
