Şirvanda Xocalı faciəsi qurbanlarının xatirəsi anılıb
Şirvan, 25 fevral, Aydın Yavərzadə, AZƏRTAC
Şirvanda Xocalı soyqırımının 30-cu ildönümünə həsr olunan ümumşəhər tədbiri keçirilib. Tədbirdə Şirvan Şəhər İcra Hakimiyyətinin başçısı İlqar Abbasov, mərkəzi icra hakimiyyəti orqanlarının regional təşkilatlarının, hüquq-mühafizə orqanlarının rəhbərləri, ictimaiyyət nümayəndələri, şəhid ailələri iştirak ediblər.
AZƏRTAC-ın bölgə müxbiri xəbər verir ki, iştirakçılar əvvəlcə Şəhidlər xiyabanını ziyarət edib, şəhidlərin əziz xatirələrinə dərin ehtiramlarını bildiriblər. Məktəblilərin Xocalı soyqırımının 30-cu ildönümünə həsr etdikləri rəsm və əl işlərindən ibarət sərgiyə baxış keçirilib. Sonra tədbir iştirakçıları “Şəhid Anası” memorial abidə kompleksi və “Xocalı soyqırımı” xatirə lövhəsi önünə gül-çiçək dəstələri düzüblər. Xocalı soyqırımı qurbanlarının və bütün şəhidlərin əziz xatirəsi bir dəqiqəlik sükutla yad edilib.
Tədbirdə Şirvan Şəhər İcra Hakimiyyətinin başçısı İlqar Abbasov çıxış edərək Xocalı soyqırımının 30-cu ildönümünün Şirvan şəhərində silsilə tədbirlərlə qeyd edildiyini, keçirilən tədbirlərdə ermənilərin azərbaycanlılara qarşı törətdikləri cinayətlər, faciələr və soyqırımlarının real faktlar əsasında gənc nəslə, geniş ictimaiyyətə çatdırıldığını bildirib. İlqar Abbasov Xocalı faciəsinin başvermə səbəblərindən, xocalılılara qarşı xüsusi qəddarlıqla törədilən soyqırımının nəticələrindən danışıb. O, Azərbaycan xalqının ümummilli lideri Heydər Əliyevin siyasi hakimiyyətə qayıtdıqdan sonra Xocalı soyqırımına hüquqi-siyasi qiymət verdiyini qeyd edib. Həmçinin Azərbaycan Respublikasının Prezidenti İlham Əliyevin, Birinci vitse-prezident Mehriban xanım Əliyevanın və Heydər Əliyev Fondunun vitse-prezidenti Leyla xanım Əliyevanın rəhbərliyi ilə Azərbaycan həqiqətlərinin dünya ictimaiyyətinə çatdırıldığını, “Xocalıya ədalət!” beynəlxalq kampaniyası çərçivəsində Xocalı soyqırımının, ermənilərin törətdikləri vəhşiliklərin dünya ictimaiyyəti tərəfindən tanınması, hüquqi-siyasi qiymət alması istiqamətində kompleks tədbirlərin həyata keçirildiyini bildirib.
Vurğulanıb ki, 30 ilə yaxın erməni işğalı altında olan tarixi torpaqlarımız Ali Baş Komandan İlham Əliyevin rəhbərliyi ilə müzəffər Ordumuz tərəfindən 44 gün davam edən Vətən müharibəsi nəticəsində azad olunub. Bu müharibədə Şirvan şəhərindən 22 gənc şəhidlik zirvəsinə yüksəlib. Onların ailələri və qazilər dövlət tərəfindən daim diqqət və qayğı ilə əhatə olunub.
Tədbirdə deputat İltizam Yusifov, Şirvan Apellyasiya Məhkəməsinin sədri Vəli Abdullayev, Xocalı sakini Arif Əzizov çıxış edərək, Xocalı soyqırımının dəhşətlərindən danışıblar.
Sonra 1 nömrəli tam orta məktəbin şagirdləri Xocalı soyqırımının 30-cu ildönümünə həsr olunan ədəbi-bədii kompozisiya ilə çıxış ediblər.
Daha sonra Vətən müharibəsində göstərdiyi şücaət və qəhrəmanlıqlarına görə təltif edilmiş şəhidlərin medalları valideynlərinə təqdim olunub.
Şəhid atası Alim Zeynalov şəhidlərə dövlət səviyyəsində verilən yüksək qiymətə və şəhid ailələrinə göstərilən diqqət və qayğıya görə Prezident İlham Əliyevə və Birinci vitse-prezident Mehriban xanım Əliyevaya şəhid ailələri adından dərin təşəkkürünü və minnətdarlığını bildirib.
Sonda şəhər icra hakimiyyətinin başçısı İlqar Abbasov şəhid ailələri ilə görüşüb, onların qayğı və problemlərini dinləyib, həlli istiqamətində aidiyyəti qurumların rəhbərlərinə tapşırıqlar verib.
Bölmənin digər xəbərləri
