Siyəzəndə Xocalı soyqırımına həsr olunmuş sərgi-müsabiqə keçirilmişdir
Siyəzən , 22 fevral (AZƏRTAC). Xocalı faciəsinin 21-ci ildönümü ilə bağlı Siyəzən Rayon Gənclər və İdman İdarəsi tərəfindən “Xocalı faciəsi xalqımıza qarşı törədilmiş ən ağır cinayətdir” mövzusunda elan edilmiş rəsm müsabiqəsi başa çatmışdır.
AZƏRTAC xəbər verir ki, müsabiqə çərçivəsində fevralın 22-də şəhər mədəniyyət sarayında Xocalı soyqırımını, onun doğurduğu acı nəticələri əks etdirən rəsm əsərlərinin nümayiş olunduğu sərgi təşkil edilmişdir.
Sərgidəki şəkilləri rayon ümumtəhsil məktəblərinin, uşaq yaradıcılıq mərkəzi və uşaq incəsənət məktəbinin şagirdləri çəkmişlər. Müsabiqədə 46-dək gənc rəssamın, ümumilikdə, 60-dan çox rəsm əsəri iştirak etmişdir.
Yer tutmuş və fərqlənmiş rəssamlar rayon gənclər və idman idarəsinin qiymətli hədiyyələri və fəxri fərmanları ilə mükafatlandırılmışlar.
Tədbirdə, eyni zamanda, məktəb şagirdləri tərəfindən soyqırımına həsr olunmuş kompozisiya göstərilmişdir.
Mərasimdə çıxış edənlər Xocalı faciəsinin bəşəriyyətə, insanlığa qarşı yönəlmiş ən qəddar cinayətlərdən biri olduğunu bildirmişlər.
Bölmənin digər xəbərləri
