Slovakiyada fövqəladə vəziyyət rejiminin müddəti 40 gün uzadılıb
Bratislava, 18 mart, AZƏRTAC
Slovakiya hökuməti ölkədə ötən il oktyabrın 1-dən qüvvədə olan fövqəladə vəziyyət rejiminin müddətini 40 gün uzadıb.
AZƏRTAC xəbər verir ki, martın 19-da müddəti başa çatmalı olan məhdudiyyətlərin vaxtının uzadılmasının səbəbi ölkədə pandemiya ilə əlaqədar vəziyyətin hələ də nəzarət altına alına bilməməsidir. Aprelin 28-dək qüvvədə olacaq fövqəladə vəziyyət dövründə dövlət qurumlarına tibbi heyətin səfərbər edilərək ölkənin müxtəlif regionlarına göndərilməsi, əhaliyə karantin rejimi tətbiq etmək və digər səlahiyyətlər verilib.
Hökumətin yeni qərarları sırasında turizm məqsədli xarici səfərlərin qadağan olunması və bununla da ölkəyə giriş-çıxışla bağlı məhdudiyyətlərin sərtləşdirilməsi yer alır. Bununla da hökumət hərəkət məhdudiyyətinə dair tənqidlərə cavab vermiş olub. Belə ki, Slovakiyada hərəkət məhdudiyyəti indiyədək məhdudlaşdırılsa da, ölkə hüdudlarından kənara tətil məqsədli səfərlərə icazə verilirdi.
Müxalifət dörd partiyadan ibarət koalisiyalı hökumətin yeni məhdudiyyətlər və sərt qaydalar sayəsində yarıtmaz fəaliyyətinə qarşı etirazların qarşısını almağa çalışdığını elan edib.
Elgün Niftəli
AZƏRTAC-ın xüsusi müxbiri
Bratislava
Bölmənin digər xəbərləri
