Son sutka ərzində Misirdə koronavirusdan iki nəfər ölüb
Qahirə, 17 mart, AZƏRTAC
Misirin Səhiyyə Nazirliyi son sutka ərzində ölkədə COVID-19 virusuna yoluxmuş iki nəfərin öldüyünü bildirib. Beləliklə, ölkədə koronavirus qurbanlarının sayı 4 nəfərə çatıb.
AZƏRTAC xəbər verir ki, həyatını itirənlərdən biri 72 yaşlı alman turist, digəri isə Misirin Dəqahliyah vilayətinin qadın sakinidir. Sonuncu xəstənin üç nəfərdən ibarət ailə üzvlərində də bu təhlükəli virus aşkar edilib. Səhiyyə Nazirliyi əlavə edib ki, martın 16-da koronavirusa daha 40 yoluxma faktı qeydə alınıb. Onlardan doqquzu Səudiyyə Ərəbistanından, Ümrə ziyarətindən gələnlərdir. Ümumilikdə isə ölkədə COVID-19 virusuna 166 nəfər yoluxub.
Ölkənin Səhiyyə naziri Hala Zayed bildirib ki, hazırda üç vilayətdə 300-dən çox ailə karantin altına alınıb. O, İngiltərənin "The Guardian" qəzetinin Misirdə 19 min nəfərin koronavirusa yoluxması xəbərini təkzib edib.
Martın 16-dan etibarən Misir hökuməti aeroportların hamısını bağlayıb və dezinfeksiya işləri aparır. Ölkədə qalmış turistlərin yola salınması üçün alternativ nəqliyyat vasitələrindən istifadə oluna bilər.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
