Soyqırımı hadisəsi dəhşətli bir cinayət aktıdır
Bakı, 27 fevral, AZƏRTAC
Elm və Təhsil Nazirliyi Nəsirəddin Tusi adına Şamaxı Astrofizika Rəsədxanasında Xocalı soyqırımının 33-cü ildönümünə həsr olunmuş “Xocalı - insanlığın sınağı” adlı tədbir keçirilib.
Bu barədə AZƏRTAC-a rəsədxanadan məlumat verilib.
Tədbirdə soyqırımı qurbanlarının əziz xatirəsi bir dəqiqəlik sükutla yad edilib.
Rəsədxananın baş direktoru AMEA-nın müxbir üzvü Namiq Cəlilov tədbiri açaraq, 1992-ci ildə Xocalıda baş verən hadisələrin Azərbaycan xalqına qarşı törədilmiş misilsiz bir faciə olduğunu vurğulayıb. O qeyd edib ki, bu soyqırımı hadisəsi XX əsrin sonlarında xalqımızın haqq mübarizəsini boğmaq məqsədilə törədilən dəhşətli bir cinayət aktıdır. Bu hadisələrin kökü 1988-ci ildən başlayaraq ermənilərin Qarabağı özlərinə birləşdirmək üçün atdıqları addımlara söykənir. Xüsusilə 1991-ci ilin sonlarından etibarən erməni silahlı birləşmələri hücumlarını intensivləşdirib və 1992-ci il fevralın 25-dən 26-na keçən gecə Rusiyanın 366-cı motoatıcı polkunun iştirakı ilə Xocalıda azərbaycanlılara qarşı soyqırımı törədilib.
Xocalı hadisəsi ötən əsrin ən dəhşətli faciələrindən biri kimi tarixə düşüb. Həmin gecə əsasən qadın, uşaq və yaşlılardan ibarət olmaqla 600-dən çox insan xüsusi qəddarlıqla qətlə yetirilib. Belə ki, soyqırımı aktı nəticəsində 613 nəfər dinc sakin öldürülüb. Onlardan 63-ü uşaq, 106-sı qadın, 70-i isə qoca olub. Səkkiz ailə tamamilə məhv edilib, 76-sı uşaq olmaqla 487 nəfər şikəst olub. Bundan başqa, 1275 nəfər əsir götürülüb, 150 nəfərin taleyi hələ də məlum deyil. Tarix boyunca müharibələr olub, lakin Xocalı faciəsi heç bir müharibə etikasına sığmır. Bu bir xalqın məhv edilməsinə yönəlmiş qanlı cinayət idi. Qanlı hadisə ilə bağlı ortaya çıxan sənədlər və tarixi faktlar göstərir ki, bu, bəşəriyyətə qarşı törədilmiş ağır bir cinayətdir və beynəlxalq hüquq normalarına tamamilə ziddir. Ümummilli Lider Heydər Əliyevin təşəbbüsü ilə 1994-cü ildə Milli Məclis fevralın 26-nı “Xocalı Soyqırımı Günü” elan edərək bu hadisəyə siyasi-hüquqi qiymət verib.
Tədbirdə çıxış edən rəsədxana əməkdaşları Xocalı həqiqətlərinin dünya ictimaiyyətinə çatdırılması, cinayətkarların məsuliyyətə cəlb edilməsi istiqamətində həyata keçirilən tədbirlərdən bəhs ediblər. Qeyd olunub ki, dünyanın bir sıra ölkələri Xocalı soyqırımını tanıyıb. Heydər Əliyev Fondunun vitse-prezidenti Leyla Əliyevanın təşəbbüsü ilə 2008-ci ildən həyata keçirilən “Xocalıya ədalət!” kampaniyası çərçivəsində beynəlxalq səviyyədə mühüm işlər görülür. Müxtəlif ölkələrdə Xocalı faciəsini əks etdirən sərgilər təşkil edilir, foto və videomateriallar nümayiş olunur.
Qarabağın işğaldan azad edilməsindən sonra artıq Xocalı sakinlərinin də öz doğma yurdlarına qayıdışına start verilib. Bu qayıdış Xocalı sakinləri üçün yeni bir başlanğıc olmaqla yanaşı, uzun illər həsrətlə gözlənilən doğma yurda dönüşün reallığa çevrilməsinin bariz nümunəsidir.
Tədbirin rəsmi hissəsindən sonra rəsədxana əməkdaşları Xocalı soyqırımı qurbanlarının xatirəsinə ucaldılmış “Ana harayı” memorialını ziyarət ediblər.
Bölmənin digər xəbərləri
