Sülh Şurasının ilk iclasında iştirak Azərbaycanın yeni beynəlxalq statusunun siyasi ifadəsidir
Bakı, 20 fevral, Nailə Həsənova, AZƏRTAC
Prezident İlham Əliyevin Vaşinqtonda keçirilən Sülh Şurasının ilk iclasında iştirakı yeni beynəlxalq reallıqların göstəricisidir. Burada əsas məsələ iştirak faktının özü deyil, Azərbaycanın hansı siyasi statusla və gündəmlə bu platformada təmsil olunmasıdır.
Bu fikirləri AZƏRTAC-a açıqlamasında Milli Məclisin deputatı Elçin Mirzəbəyli deyib.
Onun sözlərinə görə, Azərbaycan 2020-ci ildən sonra regional güc balansını dəyişdirən əsas aktora çevrilib: "Ərazi bütövlüyünün və suverenliyin tam bərpası ölkəni beynəlxalq hüququn selektiv tətbiqindən şikayət edən dövlət mövqeyindən çıxararaq, hüquqi legitimliyini faktiki reallıqla təsdiqləyən ölkəyə çevirdi. Bu transformasiya Bakının beynəlxalq platformalarda çıxış imkanlarını da keyfiyyətcə dəyişdi.
Vaşinqtonda keçirilən Sülh Şurasının ilk iclası məhz bu yeni mərhələnin simvoludur. Azərbaycan artıq vasitəçilik gözləyən tərəf deyil; o, regional təhlükəsizlik modelini təqdim edən və siyasi iradə nümayiş etdirən dövlətdir. Bu isə Cənubi Qafqazın geosiyasi xəritəsində subyektlik faktorunun gücləndiyini göstərir.
Vaşinqton beynəlxalq qərarvermə mexanizmlərinin formalaşdığı əsas mərkəzlərdən biridir. ABŞ paytaxtında təşkil olunan sülh formatında iştirak Azərbaycanın Qərb siyasi sistemində legitim tərəfdaş kimi qəbul edilməsinin göstəricisidir. Bu, eyni zamanda, Qərbin Cənubi Qafqaz siyasətində yeni yanaşma axtarışlarının siqnalıdır.
Azərbaycanın enerji təhlükəsizliyi sahəsində rolu, xüsusilə Avropanın alternativ mənbələrə yönəldiyi bir dövrdə, Bakını strateji aktora çevirib. Lakin məsələ təkcə enerji ilə məhdudlaşmır. Orta Dəhlizin inkişafı, nəqliyyat-kommunikasiya xətlərinin diversifikasiyası və Asiya–Avropa bağlantısında Azərbaycanın artan tranzit mövqeyi Vaşinqtonun diqqətini regiona daha sistemli şəkildə yönəldib.
Belə bir konfiqurasiyada Prezident İlham Əliyevin Sülh Şurasında iştirakı Azərbaycanın geosiyasi çəkisinin təsdiqi olmaqla yanaşı, ABŞ-nin regionla bağlı siyasətində Bakının nəzərə alınmasının zəruriliyini ortaya qoyur.
Bu kontekstdə əsas məsələ Azərbaycanın hansı blokda yer alması deyil, hansı maraqları müdafiə etməsidir. Bakı açıq şəkildə nümayiş etdirir ki, onun prioriteti regional sabitlik, iqtisadi inteqrasiya və milli təhlükəsizlikdir. Bu siyasət emosional ritorikadan deyil, rasional dövlət maraqlarından qaynaqlanır.
Azərbaycanın postmünaqişə dövründə həyata keçirdiyi genişmiqyaslı bərpa proqramları, keçmiş məcburi köçkünlərin doğma torpaqlarına qayıdışı və yeni infrastruktur layihələri sülhün praktiki təminatıdır. Bu proses yalnız daxili siyasətin elementi deyil, həm də beynəlxalq ictimaiyyətə verilən mesajdır: sabitlik real investisiya və siyasi iradə tələb edir.
Vaşinqtonda keçirilən Sülh Şurasının ilk iclasında iştirak bu baxımdan Azərbaycanın regional məsuliyyət daşıyan aktor statusunu möhkəmləndirir. Bakı yalnız öz maraqlarını deyil, regionun uzunmüddətli təhlükəsizliyini nəzərə alan yanaşma təqdim edir.
Prezident İlham Əliyevin Vaşinqtonda Sülh Şurasının ilk iclasında iştirakı həm də Azərbaycanın yeni beynəlxalq statusunun siyasi ifadəsidir. Bu, postmünaqişə mərhələsindən sonra formalaşan reallıqların qlobal müzakirə müstəvisinə daşınması və uğur qazanması deməkdir.
Vaşinqton platformasında verilən əsas mesaj isə aydındır. Cənubi Qafqazda dayanıqlı sülh yalnız region dövlətlərinin siyasi iradəsi və qarşılıqlı hörmət prinsipi əsasında mümkün ola bilər və bu prosesin əsas təşəbbüskarlarından, zəmanətçilərindən biri və birincisi məhz Azərbaycandır.
Bölmənin digər xəbərləri
