SÜZEN KRAUÇ: “SƏRGİNİN TƏŞKİLİNƏ RESPUBLİKA PREZİDENTİNİN YAXINDAN DƏSTƏK VERMƏSİ BİZİ SEVİNDİRİR”
AZƏRTAC-ın müxbiri xəbər verir ki, konfransda palatanın vitse-prezidenti Mehman Əhmədov 1994-cü ildən indiyədək keçirilən beynəlxalq miqyaslı bu tədbirdə dünyanın 60 ölkəsindən 3300-dən artıq yerli və xarici şirkətin təmsil olunduğunu, 20–dən artıq neft müqaviləsinin bağlandığını, Azərbaycan iqtisadiyyatına 12 milyard dollardan artıq xarici sərmayə qoyulduğunu, Xəzərin karbohidrogen ehtiyatlarının dünya bazarlarına çıxarılması istiqamətində qlobal layihələrin uğurla həyata keçirildiyini dedi və belə sərgilərdə elmi-texniki nailiyyətlərin nümayiş etdirilməsinin iqtisadi və siyasi əhəmiyyətindən söz açdı. O, indiki sərgini ümummilli liderimiz Heydər Əliyevin neft strategiyasının real bəhrəsi kimi səciyyələndirdi.
Şirkətin sədri Süzen Krauç bu beynəlxalq sərgi-konfransa Azərbaycan Respublikası Prezidenti İlham Əliyevin çox böyük əhəmiyyət verdiyini, onun təşkili ilə yaxından maraqlandığını qeyd etdi. Xanım Krauç sərgidə ilk dəfə olaraq, Azərbaycanın milli pavilyonunun açılacağını, orada kiçik və orta müəssisələrin təmsil olunacağını, indiki sərgidə dünyanın 27 ölkəsindən 338 şirkətin iştirak edəcəyini vurğuladı. Şirkətin sədri sərgi-konfransın keçirilmə qaydaları barədə qısa məlumat verdi.
Sonra jurnalistlərin sualları cavablandırıldı.
