Tamam Cəfərova: Münxen Konfransı ölkəmizin xarici siyasət kursundakı növbəti uğuru oldu
Bakı, 21 fevral, AZƏRTAC
Azərbaycanın beynəlxalq təşkilatlarla qarşılıqlı anlaşma və əməkdaşlıq çərçivəsində qurduğu münasibətlər dövlətimizin mövqeyini qlobal arenada gündən-günə gücləndirir. Bu gün təkcə Cənubi Qafqaz regionunda deyil, bütövlükdə dünyada nəzərdə tutulan layihələrdə Azərbaycan Respublikasının maraqları və mövqeyi nəzərə alınır. Əlbəttə, burada Prezident İlham Əliyevin beynəlxalq arenada dövlətimizin nüfuzunun və gücünün artırılması istiqamətində gərgin diplomatik fəaliyyətini xüsusilə vurğulamalıyıq. Bu baxımdan dövlətimizin başçısının 59-cu Münxen Təhlükəsizlik Konfransındakı iştirakını ölkəmizin xarici siyasət kursundakı növbəti uğurlu addımı kimi qiymətləndirməliyik.
Bu fikirləri AZƏRTAC-a açıqlamasında Milli Məclisin deputatı Tamam Cəfərova deyib.
Deputatın sözlərinə, dünyadakı münaqişələr, təhdidlər fonunda davamlı sülhün bərqərar olunması istiqamətində Münxen Konfransı vacib platformadır. Bu konfransa ölkəmizin başçısının ali qonaq qismində dəvət olunması dövlətimizin yüksək nüfuzunun və mövqeyinin göstəricisidir. Bu həm də Azərbaycanın dünyada sülhpərvər ölkə olduğunun təsdiqi və əyani sübutudur. Prezident İlham Əliyevin səfər çərçivəsində keçirdiyi görüşlər, müzakirələr isə dövlətimizin xarici siyasət kursunun çoxşaxəli əlaqələrinin nəticəsi kimi təqdirəlayiqdir.
“Tarixdə ilk dəfədir ki, Münxen Təhlükəsizlik Konfransı vasitəsilə Azərbaycanın, Ermənistanın və Gürcüstanın rəhbərləri eyni zamanda, bir platformada görüşdülər. Ermənistanın baş naziri Nikol Paşinyan bu tədbirdə iştirak etməkdən çəkinirdi. Bunun da əsaslı səbəbi var. Çünki Paşinyan 2020-ci ildə Azərbaycan Prezidenti ilə debatlarda düşdüyü mürəkkəb vəziyyəti və rüsvay olmasını unutmayıb. Yalnız Fransa Prezidenti E.Makronun onun iştirakını təkidlə istəməsi və dəstəyi Paşinyanın Münxenə gəlməsinə səbəb oldu. Ancaq bu da Paşinyanı növbəti iflasdan xilas etmədi.
Münxendə üçtərəfli görüşün ABŞ Dövlət katibi Antoni Blinkenin iştirakı ilə baş tutması aydın göstərdi ki, Fransanın bu prosesdə heç bir yeri və rolu yoxdur. Mövcud vəziyyət bu məsələdə Azərbaycanın prinsipial mövqeyi ilə yanaşı, həm də Fransanın birtərəfli ermənipərəst siyasəti ilə şərtlənir. Avropa İttifaqı Şurasının Prezidenti Şarl Mişelin iştirakı ilə uğurlu başlanğıc götürmüş Brüssel formatının sonrakı mərhələdə pozulması da məhz Fransanın təşəbbüsə yiyələnmək cəhdindən sonra baş verdi”, - deyə T.Cəfərova bildirib.
Deputat qeyd edib ki, Prezident İlham Əliyev Azərbaycanın milli maraqları çərçivəsində bir daha qəti mövqeyini ortaya qoydu. Birgə görüşdən sonra televiziya kanallarına müsahibəsində dövlətimizin başçısı Ermənistanla Azərbaycan arasında sülh sazişinin imzalanması üçün lazım olan şərtlərin mövcudluğundan danışdı, sülh müqaviləsinin beynəlxalq norma və prinsiplər əsasında tərtib edilməsinin vacibliyini şərt kimi diqqətə çatdırdı.
“Münxen Təhlükəsizlik Konfransı Azərbaycanın beynəlxalq arenada nüfuzunun daha da möhkəmlənməsi baxımından vacib və uğurlu bir tədbir oldu. Azərbaycan Prezidenti Qafqazda sülhün və sabitliyin bərqərar olması, həmçinin, dövlətimizin milli maraqlarının təmin olunması istiqamətində bütün imkanlardan ən yüksək səviyyədə istifadə edir. Əminliklə deyə bilərik ki, bu konfransda Prezident İlham Əliyevin iştirakı Azərbaycanın təkcə iqtisadi baxımdan deyil, həm də siyasi cəhətdən beynəlxalq arenada ciddi nüfuza malik olduğunun təzahürüdür”, - deyə Tamam Cəfərova fikirlərini yekunlaşdırıb.
Bölmənin digər xəbərləri
