AZƏRTAC Bi-Bi-Si-yə istinadla xəbər verir ki, Londonun Tauer qəsrindəki məşhur qara qarğaları quş qripindən qorumaq üçün qəfəsdə saxlamaq qərara alınmışdır. Altı qarğa üçün xüsusi volyerlər tikilmişdir və indi quşlar yeni şəraitə öyrəşir. Tauer qarğaları orta əsr əsatirləri qəhrəmanlarının şərəfinə Hugin, Munin, Tor, Branven, Qvillum və Boldrik adlandırılmışdır. Əfsanəyə görə, Tauerdəki qarğalar məhv olsa, ölkədə monarxiyanın sonu çatacaqdır. Buna görə də quşlara daim qayğı göstərilir, xüsusi yem verilir və onlar qəza-bəladan hifz olunur. Tauer qarğalarının keşikçisi Derrik Koyl demişdir ki, quşların vaksinasiya məsələsi nəzərdən keçirilir. Virusun Avropada yayılması sürətini nəzərə alaraq, istər-istəməz onları qəfəsdə saxlamalıyıq.
Brüsseldə Avropa İttifaqı ölkələrinin kənd təsərrüfatı nazirlərinin görüşü keçiriləcəkdir. Tədbirdə quş qripi epidemiyasının Avropada yayılması ilə bağlı son hadisələr müzakirə olunacaqdır. Ötən bazar günü Birləşmiş Krallığın müxtəlif rayonlarında 9 ölü qu quşu tapılmışdır. Aparılan testlər nəticəsində quş qripi virusu aşkar edilməsə də, Britaniya hökuməti təhlükəli xəstəliyin ölkə ərazisində yayılması ehtimalının böyük olduğunu bildirmişdir.
