TEATR MÖVSÜMÜ BAŞA ÇATMIŞDIR
Teatrın mətbuat xidmətindən AZƏRTAC-a bildirmişlər ki, hazırda repertuarında 40-dan artıq milli, klassik opera və balet tamaşası olan kollektiv yola saldığı mövsümdə dövlət sifarişi əsasında iki tamaşanı - Üzeyir Hacıbəyovun 120 illik yubileyi münasibətilə “Leyli və Məcnun” operasını yeni quruluşda, bəstəkar Polad Bülbüloğlunun “Eşq və ölüm” baletini təhvil vermişdir. Sonuncu Bakıdakı ilk uğurlu tamaşasından sonra Sankt-Peterburqun Mariya Teatrının və Rusiya Akademik Böyük Teatrının səhnələrində də oynanılmışdır. Rusiya Federasiyasında Azərbaycan ilinə bu tamaşa ilə yekun vurulmuşdur.
Başa çatan mövsümdə teatrın səhnəsində Rusiya, Ukrayna, Belarus, Gürcüstan opera və balet teatrlarının tanınmış sənətkarlarının iştirakı ilə maraqlı tamaşalar göstərilmiş, bir neçə istedadlı gəncin debütü olmuşdur.
Mövsüm başa çatsa da, kollektiv yay istirahətinə getməyə tələsmir. Hazırda Ü.Hacıbəyovun “ O olmasın, bu olsun” musiqili komediyası üzərində qızğın iş gedir. Kollektiv yeni mövsümü bu tamaşa ilə açmaq fikrindədir.
Bölmənin digər xəbərləri
