QAN YADDAŞI
TEATR XOCALI FACİƏSİNİN İLDÖNÜMÜ İLƏ ƏLAQƏDAR QASTROL SƏFƏRİNƏ ÇIXACAQDIR
AZƏRTAC Azərbaycan Dövlət Akademik Milli Dram Teatrının mətbuat xidmətinə istinadla xəbər verir ki, kollektiv Xocalı soyqırımının ildönümü ilə əlaqədar martın 1-dən 7-dək Lənkəran, Astara, Masallı, Sabirabad və Biləsuvar rayonlarında qastrol səfərində olacaqdır.
Teatrın aktyor truppası həmin rayonların tamaşaçılarına yazıçı-dramaturq Hüseynbala Mirələmovun “Xəcalət” əsərini təqdim edəcəkdir.
Qarabağ müharibəsində çiyin-çiyinə vuruşmuş, gərgin psixoloji anlar yaşamış, sonralar bir-birindən ayrı düşmüş iki uşaqlıq dostunun görüşündən bəhs olunan tamaşanın quruluşçu rejissoru əməkdar incəsənət xadimi Bəhram Osmanovdur.
Əsas rollarda xalq artistləri Nurəddin Mehdixanlının, Ramiz Novruzun, əməkdar artistlər Mətanət Atakişiyevanın, Əsgər Məmmədoğlunun və başqalarının çıxış etdikləri tamaşanın rəssamı əməkdar rəssam İsmayıl Məmmədovdur.