Təbrizdə Ulu Öndərin anadan olmasının 102-ci ildönümü münasibətilə tədbir keçirilib
Bakı, 8 may, AZƏRTAC
İran İslam Respublikasının Təbriz şəhərində Azərbaycan Respublikasının baş konsulluğunun inzibati binasında Ümummilli Lider Heydər Əliyevin anadan olmasının 102-ci ildönümü ilə əlaqədar tədbir keçirilib.
Baş konsulluqdan AZƏRTAC-a bildirilib ki, tədbirdə Ümummilli Liderə həsr olunmuş sənədli film nümayiş etdirilib və fotoşəkillərdən ibarət sərgi təşkil olunub.
Tədbirdə Türkiyənin Təbrizdəki baş konsulu Çetin Taner və qardaş ölkənin diplomatları, bu şəhərdə yaşayan Azərbaycan vətəndaşları və onların ailə üzvləri, Azad İslam Universitetinin azərbaycanlı tələbələri iştirak ediblər.
İştirakçılar Ümummilli Lider Heydər Əliyevin və torpaqlarımızın azadlığı uğrunda canlarını qurban vermiş şəhidlərimizin əziz xatirəsini 1 dəqiqəlik sükutla yad ediblər.
Tədbirdə çıxış edən baş konsul Əliyənnağı Hüseynov bildirib ki, Azərbaycan xalqının böyük oğlu, dünyaşöhrətli siyasi və dövlət xadimi Heydər Əliyevin əbədiyaşar şəxsiyyətinə göstərilən hörmət və ehtiram dövlətimizə, ölkəmizə və xalqımıza verilən yüksək dəyərdir. 1993-cü ildə xalqın çağırışı ilə hakimiyyətə qayıdan Ulu Öndər Heydər Əliyev Azərbaycanda bütün sahələrdə baş verən böhranın qarşısını almaqla ölkəmizi və dövlətimizi məhv olmaqdan xilas edib. Məhz Ulu Öndərin müdrikliyi, qətiyyəti və cəsarətli addımları sayəsində milli birliyimiz qorunub, ölkəmiz tərəqqi yoluna qədəm qoyub.
Baş konsul vurğulayıb: “Qürur hissi və iftixarla deyə bilərik ki, Azərbaycan Respublikası ilə İran İslam Respublikasının münasibətlərinin inkişafında Ulu Öndərin səyləri öz bəhrəsini verir. Heydər Əliyev siyasi hakimiyyətinin bütün dövrlərində xalqımızın rifahı naminə misilsiz xidmətlər göstərib, yenicə müstəqilliyini bərpa edən respublikamızı parçalanmaqdan xilas edib. Azərbaycan xalqı onun bu böyük və danılmaz xidmətlərini hər zaman yüksək qiymətləndirib. Dahi siyasətçi müasir və müstəqil Azərbaycan dövlətinin qurucusudur. Belə ki, müasir Azərbaycan tarixinin böyük bir dövrü və ən şanlı səhifələri Ümummilli Lider Heydər Əliyevin adı ilə bağlıdır”.
Diplomat qeyd edib ki, bu yaxınlarda İran Prezidenti Məsud Pezeşkianın Azərbaycana səfəri zamanı müzakirə olunan nəqliyyat-kommunikasiya layihələri də vaxtilə Ulu Öndər Heydər Əliyevin əsasını qoyduğu strategiyanın bəhrəsidir.
O, həmçinin Azərbaycan Prezidenti İlham Əliyevin rəhbərliyi altında qüdrətli Azərbaycan Ordusunun torpaqları düşmən tapdağından azad etməsini, ölkəmizin ərazi bütövlüyü və suverenliyinin tam bərpa olunmasını Ulu Öndərin ümdə arzularının həyata keçməsi kimi dəyərləndirib. Baş konsul ölkəmizin əldə etdiyi uğurlar barədə də tədbir iştirakçılarına ətraflı məlumat verib.
Təbirdə Türkiyənin Təbrizdəki baş konsulu Çetin Taner çıxış edərək bildirib: “Dahi dövlət xadimi, Türk dünyasının liderlərindən biri olan Heydər Əliyevin anadan olmasının 102-ci ildönümü ilə bağlı təşkil olunan bu mərasimdə iştirak etməkdən şərəf duyuram. Heydər Əliyev öz ölkəsinə, xalqına sadiq olan, Azərbaycanın qüdrətinə, böyüklüyünə, imkanlarına ürəkdən inanan bir lider idi. Onun rəhbərliyi və uzaqgörənliyi sayəsində Azərbaycan çox qısa müddətdə beynəlxalq aləmdə sanballı və nüfuzlu mövqeyə yüksəlib. Özündən sonra güclü və inkişaf edən Azərbaycan dövləti qoyan Heydər Əliyev bütün beynəlxalq ictimaiyyətin, xüsusilə də Türk dünyasının hörmətini qazanıb, öz dühası və səmərəli dövləti fəaliyyəti ilə Cənubi Qafqazın müasir tarixində dərin iz qoyub”.
Türkiyəli diplomat vurğulayıb ki, Heydər Əliyev Türkiyə-Azərbaycan qardaşlıq əlaqələrinin ən yüksək səviyyəyə çatması üçün misilsiz xidmətlər göstərib. “Təsadüfi deyil ki, dahi şəxsiyyət Heydər Əliyev Türkiyədə də sevilir və onun xatirəsi ehtiramla anılır. Bu gün iki qardaş ölkə arasında münasibətlər onun “Bir millət, iki dövlət” kəlamı əsasında uğurla inkişaf edir. Tarix boyu Azərbaycanın gücü bizim gücümüz, sevinci sevincimiz, kədəri kədərimiz olub, bundan sonra da belə olacaq. Bu əlamətdar gündə öz coğrafiyasında və onun hüdudlarından kənarda dərin iz qoymuş böyük dövlət xadimi Heydər Əliyevin xatirəsini ehtiramla yad edirik”.
Bölmənin digər xəbərləri
