TEKNOFEST festivalı Azərbaycan gəncliyinin elmə, texnologiyaya dərin marağının təsdiqi kimi diqqət çəkdi
Bakı, 31 may, AZƏRTAC
“TEKNOFEST Azərbaycan” aerokosmik və texnologiya festivalı Azərbaycan və Türkiyəni dost, qardaş, müttəfiq ölkələr olduğunu bir daha bütün dünyaya nümayiş etdirdi. Bu möhtəşəm tədbir, eyni zamanda, hər iki dövlətin inkişaf, tərəqqi yolu ilə uğurla irəlilədiyinin təsdiqinə çevrildi. Festival, həmçinin istər Azərbaycanda, istərsə də Türkiyədə yetişən gəncliyin elm və texnologiyaya böyük maraq göstərdiyini, daim yeniliyə, müasirliyə can atdığını sübuta yetirdi.
Bu sözləri AZƏRTAC-a açıqlamasında AMEA-nın Riyaziyyat və Mexanika İnstitutunun böyük elmi işçisi, mexanika üzrə fəlsəfə doktoru Emin Bağırov söyləyib.
O qeyd edib ki, “TEKNOFEST Azərbaycan”ın iştirakında gənclərimizin fəaliyyəti ilə bağlı nəzərə çarpan coşqu yeni nəslin Vətənə sevgisindən, ölkəmizin müdafiə qüdrətinin möhkəmlənməsinə töhfə vermək istəyindən, elmə və texnologiyaya sıx bağlılığından irəli gəlir. Bu, İkinci Qarabağ müharibəsinin getdiyi günləri xatırlasaq, aydın nəzərə çarpır. Vətən müharibəsində əldə edilən parlaq Qələbənin əsasında da məhz Azərbaycan gəncliyində olan vətənpərvərlik və müasir hərbi texnikanın sirlərinə dərindən yiyələnmək kimi amillər dayanır.
“Bu məqam hazırda da prioritet istiqamət təşkil edir. Azərbaycan gəncliyi elmə və texnologiyaya dərindən bağlanmaqla, bu sahədə axtarışlar aparmaqla, dünya elminin ən son yeniliklərinə maraq göstərməklə respublikamızın müdafiə sənayesinin inkişafına öz töhfəsini verməyə can atır və bu istiqamətdə müsbət nəticələr əldə edir. “TEKNOFEST Azərbaycan”a olan böyük diqqət və bu festivalda fəal iştirak da məhz bununla bağlıdır. Yeri gəlmişkən, burada bir məqamı da qeyd etmək istərdim. Dövlət başçısı İlham Əliyevin vurğuladığı kimi, Türkiyə-Azərbaycan qardaşlığı, sarsılmaz birliyi xalqlarımız üçün əsas yol istiqaməti, bölgə, dünya üçün də çox önəmli təhlükəsizlik, sabitlik amilidir. Bu amilin təməlində isə bölgəmizdə sülh və əmin-amanlıq prinsipi dayanır. Sirr deyil ki, bu gün dünyamızın ciddi ehtiyac duyduğu belə bir mövqe dövlətlərimizdən yüksək texnologiyaya əsaslanan hərbi güc, yüksək hərbi potensial tələb edir. Bunu isə yeni ideyalara, yeni texnologiyaya əsaslanan hərbi qüdrət şərtləndirir”, - deyə E.Bağırov söyləyib.
O əlavə edib ki, Bakıda ilk dəfə keçirilən “TEKNOFEST Azərbaycan” festivalına olan böyük marağı şərtləndirən digər bir səbəb isə İkinci Qarabağ müharibəsi zamanı döyüş əməliyyatlarında Azərbaycan Hərbi Hava Qüvvələri tərəfindən geniş və intensiv istifadə edilən “Bayraktar” PUA-larını işğalçıların torpaqlarımızdan qovulmasında mühüm rol oynaması ilə bağlıdır.
Emin Bağırov söhbətinin sonunda deyib: “Vətən savaşından sonra parlaq qələbəmizə qısqanclıqla yanaşan, erməni faşizminin tərəfində dayanan bir qrup alt sistem təchizatçısı PUA-ların istehsalı ilə bağlı Türkiyəyə qarşı sanksiyalar tətbiq etməklə təzyiq göstərməyə çalışdı. “Baykar Makina” isə ən qısa müddətdə həm yerli komponentləri əldə edə bildi, həm də ixrac imkanlarını artırdı. Buna isə qısa zaman ərzində qardaş ölkə tərəfindən müasir elm və texnoloji yeniliklərin kəşfi, mənimsənilməsi ilə nail olundu. Onu da deyim ki, Azərbaycanın haqq savaşında qardaş Türkiyə sonadək Azərbaycana mənəvi və siyasi dəstəyini əsirgəmədi Ən əsası müharibənin ilk günündə Türkiyə Prezidenti Rəcəb Tayyib Ərdoğanın “Azərbaycan tək deyil, Türkiyə onun yanındadır” bəyanatı xalqımıza Vətən uğrunda həlledici savaşda əlavə güc, ruh, inam verdi. Parlaq tarixi zəfər yolunda dost ölkənin PUA-ları Qələbəmizi daha da yaxınlaşdırdı, düşmənin torpaqlarımızdan təmizlənməsində əvəzsiz rol oynadı.
Türkiyə Prezidenti Rəcəb Tayyib Ərdoğanın da qeyd etdiyi kimi, 44 günlük Vətən müharibəsi ağıl, texnologiya və cəsarət bir araya gəldikdə nələrin edilə biləcəyini bütün dünyaya göstərdi. Amma qarşımızda qət ediləcək hələ çox məsafə var. Hər məsələdə olduğu kimi, müdafiə sənayesində də gənclərimizin biliklərinə, enerjisinə, əzminə, səylərinə güvənirik. “TEKNOFEST” məhz bu güvənin rəmzi olan bir tədbirdir.
Qardaş ölkə bu gün də Azərbaycanın yanında olmaqla işğalçının yerlə-yeksan etdiyi Qarabağ və Şərqi Zəngəzurda aparılan genişmiqyaslı bərpa-quruculuq layihələrində fəal iştirak edir, Böyük Qayıdışın reallaşmasında Azərbaycana dəstək verir. Beləliklə, artıq sona çatan “TEKNOFEST” birliyimizin, qardaşlığımızın növbəti nümayişinə, təsdiqinə çevrildi. Bu festival iki ölkənin inkişaf, tərəqqi bayramı, gəncliyin bilik, texnologiya yarışı kimi diqqət çəkdi, eyni zamanda, hər iki ölkə gənclərini bir-birinə daha da yaxınlaşdırdı, doğmalaşdırdı, aralarında elm, düşüncə münasibətlərini möhkəmləndirdi”.
Bölmənin digər xəbərləri
