Tərtərdə 20 Yanvar faciəsi qurbanlarının xatirəsi anılmışdır
Tərtər, 20 yanvar (AZƏRTAC). Azərbaycan xalqının qan yaddaşına əbədi həkk olunmuş 20 Yanvar faciəsinin 23-cü ildönümü Tərtər rayonunda xalqımızın qəhrəmanlıq salnaməsi, milli qürur günü kimi qeyd olunmuşdur. Rayonun idarə və müəssisələrində, kəndlərdə anma mərasimləri təşkil olunmuş, ümumtəhsil məktəblərində ilk dərslər 20 Yanvar faciəsinə həsr olunmuşdur.
AZƏRTAC xəbər verir ki, yanvarın 20-də rayon rəhbərliyi, əmək kollektivlərinin nümayəndələri, məktəblilər, ağsaqqallar və gənclər Tərtər şəhərində 20 Yanvar şəhidlərinin xatirəsinə ucaldılmış abidə-kompleksin önünə tər çiçəklər düzmüş, şəhidlərin xatirəsini ehtiramla yad etmiş, ruhuna dualar oxumuşlar.
Anma mərasimi Gənclər Mərkəzində davam etdirilmişdir. Çıxış edənlər 1990-cı il yanvarın 19-dan 20-nə keçən gecə sovet qoşunlarının Bakıda və Azərbaycanın digər rayonlarında törətdikləri qanlı cinayətdən danışmışlar. Qeyd edilmişdir ki, faciədən bir gün sonra özünün və ailəsinin həyatı üçün təhlükələrə baxmayaraq, ümummilli lider Heydər Əliyev Azərbaycanın Moskvadakı daimi nümayəndəliyinə gələrək, doğma xalqının dərdinə şərik çıxmış, Qanlı Yanvar faciəsini törədənləri cəsarətlə lənətləmiş və hadisəyə siyasi-hüquqi qiymət verilməsini tələb etmişdir. Ümummilli liderimiz Heydər Əliyev xalqın təkidli tələbi ilə hakimiyyətə qayıtdıqdan sonra bu qanlı aksiya öz siyasi-hüquqi qiymətini almış, hadisənin əsl mahiyyəti dünyaya çatdırılmış, Şəhidlər xiyabanında “Əbədi məşəl” abidə kompleksi ucaldılmışdır.
Bölmənin digər xəbərləri
