Tikinti sektorunun inkişaf etdirilməsində inşaatçıların əməyi əvəzolunmazdır
Bakı, 10 aprel, AZƏRTAC
Azərbaycanın sosial-iqtisadi inkişafında xüsusi əhəmiyyətə malik tikinti sektorunun inkişaf etdirilməsində inşaatçıların əməyi əvəzolunmazdır. Yüz minlərlə inşaatçı mütəxəssisin fədakarlıqla çalışdığı bu sektorda hamı peşə bayramını iş başında qarşılayır. Məhz bu səbəbdən inşaatçıların əməyi ən yüksək qiymətə layiqdir. Azərbaycan Respublikasının Prezidenti İlham Əliyevin 2009-cu il 16 dekabr tarixli Sərəncamına əsasən hər il aprel ayının 10-u İnşaatçılar Günü kimi qeyd olunur. Bu, ölkə başçısının bütövlükdə tikinti kompleksi işçilərinin - inşaatçıların, memarların və mühəndislərin əməyinə verdiyi yüksək dəyərin bariz nümunəsidir.
Bu bayram qurub-yaradan, gələcək nəsillərə gözəl, yaraşıqlı sosial-mədəni obyektlər, sənaye obyektləri kimi böyük miras qoyanların bayramıdır. Mən həmişə fəxr etmişəm ki, nə yaxşı həyatda belə bir peşənin sahibi olmuşam, insanların mənzil-məişət, sosial məsələlərinin həllində az-çox iştirakım var və inşaatçı kadrlar ordusunun yetişdirilməsinə də öz töhfəmi verə bilirəm. İnşaatçılar dünənin və bu günün mühüm yaradıcıları, şəhər və qəsəbələrin, sənaye müəssisələrinin qurucularıdır. Onlar yeni və müasir, unikal bina və qurğular inşa etməklə yanaşı, həm də keçmişimizdən bizə yadigar qalmış tarixi-memarlıq incilərinin qorunub saxlanmasında da yaxından iştirak edirlər. Ona görə də inşaatçı kadrlara “qızıl əllərə” malik peşə sahibi deyirlər. İnşaatçılardan söz düşəndə istər-istəməz “tikmədim özüm qalam, tikdim ki, izim qala” misalı əbəs yerə yada düşmür.
Bunu AZƏRTAC-a müsahibəsində Azərbaycan Memarlıq və İnşaat Universitetinin İnşaat fakültəsinin dekanı Sahib Fərzəliyev deyib. Onun sözlərinə görə, tikinti sənayesi respublikamızın sosial-iqtisadi tərəqqisində mühüm əhəmiyyət kəsb edir, yüksək inkişaf tempinə və böyük perspektivə malikdir. Bu mühüm sahə milli iqtisadiyyatın mühüm tərkib hissəsi olmaqla ümumi daxili məhsulun həcmində son 10 ildə orta hesabla 9,2% təşkil edir. Tikinti istehsalatının inkişaf dinamıkası onu göstərir ki, son 10 ildə əsaslı tikintiyə həm dövlət, həm də özəl sektor tərəfindən xeyli investisiya qoyulub. Hazırda ölkəmizin tikinti sektorunda 100 mindən çox işçı çalışır ki, onların orta əmək haqqı 800 manatdan çoxdur. Respublikamızda son illərdə şəhərlərimizə gözəllik verən bir sıra unikal sosial-mədəni obyektlər və qurğular inşa edilib. 2021-ci ildə 44 günlük müharibə zamanı işğaldan azad edilmiş ərazilərimizdə tikinti-quruculuq işlərinə başlanılıb. Bu, tikinti sektorunda yeni bir mərhələnin başlanğıcını qoyub.
Dekan vurğulayıb ki, Prezident İlham Əliyev işğaldan azad edilmiş ərazilərimizdə inşa ediləcək tikililərin dünya memarlıq-tikinti mədəniyyətinin tələblərinə uyğun olaraq yerinə yetiriləcəyi haqqında həm xalqımıza, həm də dünya ictimaiyyətinə öz mühüm mesajlarını verib. Bu, həmçinin inşaatçı kadr hazırlığı ilə məşğul olan ali təhsil müəssisələrinin də qarşısında yeni tələblər qoyur. Müasir layihələndirmə standartlarına cavab verən layihəçilərin və tikinti-quraşdırma işlərini yerinə yetirə bilən inşaatçı mühəndislərin hazırlanması məsələsini günün tələbinə çevirir. Ölkə başçısının qarşıya qoyduğu əsas məsələlərdən biri də ölkəmizin ərazisində aparılan tikinti-quruculuq, bərpa-abadlıq işlərinin dünya şəhərsalma-tikinti mədəniyyətinə uyğun, möhtəşəm və bənzərsiz olması tələbidir. Bu səbəbdən ali təhsil müəssisələrində peşəkar inşaatçı kadrların hazırlanması həm kəmiyyətcə, həm də keyfiyyətcə yeni məzmun kəsb edir. İnşaatçı mütəxəssislərə olan tələbat bu sahə üzrə kadr hazırlığı ilə məşğul olan Azərbaycan Memarlıq və İnşaat Universitetini, o cümlədən rəhbərlik etdiyim İnşaat fakültəsinin fəaliyyətini aparıcı təhsil sahələri kimi ön plana çıxarır. Bu məsuliyyətli vəzifənin öhdəsindən gəlmək üçün inşaatçı kadr hazırlığını həyata keçirən professor-müəllim heyətinin qarşısında yeni vəzifələr qoyur. “Ümidvaram ki, bu peşə sahiblərinin birlik simvoluna çevrilmiş İnşaatçılar Günü hər il olduğu kimi, bu il də möhtəşəm yeni şəhərsalma-tikinti layihələri, mühüm sosial-mədəni obyektlərlə xalqın yaddaşında unudulmaz izlər qoyacaq, təkrarsız tikinti-memarlıq abidələri ilə yadda qalacaq”, - deyə S.Fərzəliyev fikrini yekunlaşdırıb.
Bölmənin digər xəbərləri
