REGİONLAR
Tolerantlıq və birgəyaşayış məkanı olan Nicdə prezident seçkilərinə hazırlıq işləri başa çatıb
Qəbələ, 5 fevral, AZƏRTAC
Növbədənkənar prezident seçkiləri ilə bağlı Qəbələ rayonunda da hazırlıq işləri başa çatıb.
Rayonun Nic qəsəbəsi müxtəlif xalqların birgə yaşadığı tolerantlıq məkanı kimi hər zaman yerli və xarici müşahidəçilərin diqqətində olur. 117 saylı Oğuz-Qəbələ-Şəki seçki dairəsi üzrə bu qəsəbədə üç seçki məntəqəsi fəaliyyət göstərir. AZƏRTAC-ın əməkdaşı qəsəbədəki hər üç seçki məntəqəsində olub, sakinlərlə görüşərək, onların fikirlərini dinləyib.
Nicdə əsasən udilər məskunlaşıb. Çünki onlar tarix boyu burada Azərbaycan xalqı və dövlətindən diqqət və qayğı görüblər.
Marietta Kuşnarın sədri olduğu 57 saylı seçki məntəqəsi qəsəbənin tam mərkəzində yerləşir. Bu məntəqə üzrə 1445 seçici səsvermə hüququna malikdir. Məntəqə sədri seçki prosesinə tam hazır olduqlarını bildirib.
Elə buradaca seçici siyahısında adını dəqiqləşdirmək üçün məntəqəyə gələn Asya Falqari ilə qarşılaşırıq. Ali təhsilli müəllim uzun illərdir ki, qəsəbə məktəbində dərs deyir. “Dünyanın hansı tərəfinə gedirsən-get Nic əvəzolunmazdır” - deyə söhbətə başlayan Asya müəllim, burada xalqların mehriban birgəyaşayışını başqa yerlərlə müqayisə belə etmək istəmir. Bu qəsəbədə azərbaycanlılarla yanaşı udilərin, ləzgilərin, rusların əsrlərdir mehriban yaşadığını diqqətə çatdıran Asya müəllim, qohumluq əlaqələri olan ailələrin, qız alıb-qız verənlərin də sayının gündən-günə artdığını deyir.
Venera Antonova qəsəbənin tanınmış ziyalılarındandır. İxtisasca ingilis dili müəllimidir və şagirdlərinin sorağı dünyanın müxtəlif ölkələrindən gəlir. Venera müəllim qəsəbədəki 58 saylı seçki məntəqəsində ailəsi və yaxınları ilə səs verəcək. Bu məntəqədə isə 1082 seçici var. Onlardan 10 gənc ilk dəfə səs verəcək.
“Hamılıqla seçkiyə hazırlaşırıq. Udi xalqının nümayəndəsi kimi demək istəyirəm ki, dil, din və folklorumuzu inkişaf etdirmək üçün tarixin bütün zamanlarında burada bizim üçün hər cür şərait yaradılıb. Qəsəbədə üç məktəbdə udi dili tədris olunur. 44 günlük Vətən müharibəsi günlərində bizdə “Məryəm ana” kilsəsi əsaslı bərpa və restavrasiya olunaraq istifadəyə verildi. Dünyanın heç bir yerində azsaylı xalqlara bundan yüksək diqqət və qayğı ola bilməz” - deyən Venera xanım seçkilərin yüksək fəallıqla keçəcəyinə əmindir. “Hər bir vətəndaş öz səsvermə hüququndan istifadə edəcək və ən layiqli namizədə səs verəcək” - deyə o, fikrini tamamlayır.
Qəsəbədəki 59 saylı seçki məntəqəsi də bu günlərdə insanlarla dolub-daşır. 1412 seçicinin səs verəcəyi məntəqədə ilkin hazırlıqlar başa çatıb. Buradakı səliq-sahman da göz oxşayır.
Seçici siyahısında adını dəqiqləşdirmək üçün gələn gənc diqqətimizi cəlb edir. Yaxınlaşıb tanış oluruq. Feliks Ceyranov 44 günlük Vətən müharibəsinin iştirakçısı və qazidir. Deyir ki, udi gəncləri dövlətə, xalqa, Vətənə bağlıdırlar. Harada olmasından aslı olamayaraq, ana vətənləri Azərbaycan üçün bir yumruq kimi birləşməyi bacarırlar. Elə Vətən müharibəsi də bunu göstərdi...
Qəsəbədə olduğumuz müddətdə seçki məntəqələrinin üzvləri, eləcə də ağsaqqallar və gənclərlə söhbətləşmək, fikir mübadiləsi aparmaq imkanımız oldu. Hər kəsin bir ümumi fikri var: Azərbaycan artıq ərazi bütövlüyünü təmin edib və ilk dəfədir bütün ölkə üzrə seçki keçiriləcək. Ona görə də hər bir vətəndaş səsvermədə iştirak etməli və öz namizədinə səs verməlidir.