“TotalEnergies”: Metanın atmosferə buraxılmasının qarşısının alınması prioritetdir
Bakı, 1 iyun, AZƏRTAC
“TotalEnergies” 2023–2025-ci illər ərzində bütün aktivlər üzrə enerji səmərəliliyi layihələrinin həyata keçirilməsi üçün təxminən 2 milyard dollar həcmində investisiya həyata keçirir. Bu layihələrə mühərriklərin daha səmərəli avadanlıqlarla əvəzlənməsi və generatorların modernləşdirilməsi daxildir.
AZƏRTAC xəbər verir ki, bu barədə “TotalEnergies” şirkətinin bərpaolunan enerji üzrə baş biznes inkişafı mütəxəssisi Çingiz Orucov Bakı Enerji Həftəsi çərçivəsində keçirilən 31-ci Beynəlxalq Xəzər Neft və Qaz Sərgisi “Caspian Oil and Gas”, 14-cü Xəzər Beynəlxalq Təmiz Enerji Sərgisi “Caspian Power” və 31-ci “Baku Energy Forum” çərçivəsində təşkil olunan “Upstrem əməliyyatlarında emissiyaların azaldılması: praktik yanaşmalar - metan emissiyasının azaldılması, elektrikləşdirmə və dərhal təsir göstərən əməliyyat səmərəliliyinin artırılması" mövzusunda keçirilən panel müzakirəsində çıxışı zamanı bildirib.
O qeyd edib ki, metanın atmosferə buraxılmasının qarşısının alınması və qaz sızmalarının aradan qaldırılması qlobal istiləşməyə təsir baxımından yüksək prioritet daşıyır: “Bu sahə qısa müddətdə ölçüləbilən nəticələr əldə etməyə imkan verir. Metan emissiyaları ilə bağlı tədbirlər prioritet olmalıdır”.
Bölmənin digər xəbərləri
