Tovuzda yeni üzüm bağları salınır
Tovuz, 17 mart, Rauf Hacıyev, AZƏRTAC
İqtisadiyyatının əsasını müxtəlif kənd təsərrüfatı məhsullarının istehsalı təşkil edən Tovuzda Prezident İlham Əliyev tərəfindən qəbul olunmuş “2012-2020-ci illərdə Azərbaycan Respublikasında üzümçülüyün inkişafına dair Dövlət Proqramı”na uyğun olaraq rayon üçün ənənəvi sahələrdən olan üzümçülüyün daha da inkişafına diqqət yetirilir və bu məqsədlə rayonlaşdırılmış üzüm sortlarından yeni üsullarla plantasiyalar salınır.
AZƏRTAC-ın bölgə müxbiri xəbər verir ki, Tovuz Rayon İcra Hakimiyyətinin başçısı Məmməd Məmmədov rayonun Aşağı Quşçu kəndində bir sıra istehsal sahələrini vahid halqa halında birləşdirən təsərrüfata gələrək yeni salınan üzüm bağlarında və ona xidmət edən sahədə, plantasiyanın bazasında yaradılan soyuducu anbarda olub və görülən işlərlə maraqlanıb.
Məlumat verilib ki, “Alfonsa”, “Şalfey”, “Melored” kimi üzüm sortlarını yerli üzümçülər calaq üsulu ilə əldə ediblər. Aşağı Quşçu kəndində 2019-cu ildə yaradılan üzüm emalı müəssisəsi üzümçülərə istehsal etdikləri məhsulu vaxtında satmağa imkan vermiş, qəbul olunan məhsulun dəyəri yerində ödənildiyinə görə fermerlərin gəlirləri də artmışdır. Bildirilib ki, kənddə yaradılan həmin emal müəssisəsi ildə 3 min ton üzüm qəbul etməyə imkan verir və orada İtaliya, Fransa və digər xarici ölkələrdən müasir texnoloji avadanlıqlar alınaraq quraşdırılıb.
Təsərrüfatın sahibi İsmayıl Hüseynov dövlətin fermerlərə, aqrar sahədə çalışanlara yaratdığı geniş imkandan istifadə edərək müasir üzüm plantasiyası salaraq əlavə işçi qüvvəsi cəlb etməklə həmin bağa qulluq göstərir. Təsərrüfatda bazarın tələbinə uyğun üzüm tinglərindən salınmış bağlar vaxtında şpalerə qaldırılır, quru budamadan tutmuş digər aqrotexniki tədbirlər vaxtında həyata keçirilir. Plantasiya üçün dəmir-beton dayaqlar istehsal olunur, sifariş əsasında digər üzümçülərə də satılır.
Bölmənin digər xəbərləri
