Tramp Şükranlıq bayramı ilə əlaqədar Qabl və Vadl adlı hind toyuqlarını əfv edib
Vaşinqton, 25 noyabr, AZƏRTAC
ABŞ-da Ağ Evdə Şükranlıq bayramı ilə əlaqədar ənənəvi hind toyuğunun bağışlanması mərasimi keçirilib.
AZƏRTAC-ın məlumatına görə, ABŞ Prezidenti Donald Tramp çıxış edərək xalqı bayram münasibətilə təbrik edib və daha sonra Qabl və Vadl adlı hind toyuqlarını əfv edib. Bu il bayram süfrəsində olmayacaq quşlar geriyə - Şimali Karolinaya göndəriləcək.
Hind toyuğu ABŞ-da Şükranlıq bayramında süfrələrin əsas yeməyidir. Fermerlər və quşçular bu günün ABŞ-da rəsmi olaraq bayram elan edildiyi 1963-cü ildən etibarən hər il Prezidentə hind toyuğu hədiyyə göndərib.
1989-cu ildə Prezident ata Corc Buş bir hind toyuğunu öldürülməkdən rəsmi şəkildə bağışladığını elan etdikdən sonra o gündən başlayaraq hər il bütün prezidentlər bunu davam etdirir.
Məlahət Nəcəfova
AZƏRTAC-ın xüsusi müxbiri
Vaşinqton
Bölmənin digər xəbərləri
