TUMİB: Mehriban Əliyevanın yardım təşəbbüsünə xalqımız böyük coşqu ilə qoşuldu
Bakı, 13 fevral, Ayla Aktar, AZƏRTAC
Türkiyədə baş vermiş zəlzələ hamımızı sarsıtdı. İlk növbədə, hər kəs fərdi qaydada qardaş ölkəyə necə yardım etmək barədə düşündü. Həmin zaman Azərbaycanın Birinci vitse-prezidenti, Heydər Əliyev Fondunun prezidenti Mehriban Əliyevanın qardaş Türkiyədə zəlzələdən zərərçəkənlərə humanitar yardımla bağlı paylaşımı və bu barədə tapşırığı oldu. Bu paylaşım qardaş və bacılarımıza dəstək məqsədilə xalqımız tərəfindən böyük məmnuniyyət hissi ilə qarşılandı və vətəndaşlarımız böyük coşqu ilə bu nəcib təşəbbüsə qoşuldu. Qardaş Türkiyənin bu ağır sınaqdan keçdiyi zamanda Birinci vitse-prezidentin təşəbbüsü onun yüksək mənəvi-əxlaqi dəyərlərə, milli təəssübkeşliyə malik olduğunun bariz nümunəsidir.
Bu sözləri AZƏRTAC-a açıqlamasında “Türkiyə Universitetləri Məzunları” İctimai Birliyinin (TUMİB) sədri Tural Əfəndiyev deyib.
“Azərbaycanın Birinci vitse-prezidentinin müraciətində əl-ələ verərək ağır sınaqlardan birlikdə üzüağ çıxmağımız xalqlarımızın ən gözəl xüsusiyyətlərindən biri olduğu qeyd edilib. Həqiqətən də Türkiyənin yanında olmağa çalışan hər kəsin ürəyi zəlzələdən zərər çəkən insanlarla birgə döyünürdü.
Azərbaycanın birinci xanımı, Heydər Əliyev Fondunun prezidenti Mehriban Əliyevanın göstərişinə əsasən, Fond tərəfindən Türkiyənin zəlzələ bölgəsinə humanitar yardım aparan xüsusi təyyarələr yola salındı. Humanitar yardıma faciədən zərərçəkmiş şəxslər üçün zəruri avadanlıqlar, çadırlar, istilik radiatorları, generatorlar, axtarış-xilasetmə işlərinə dəstək məqsədilə ləvazimatlar, dərman preparatları, tibbi ləvazimat, isti geyimlər və s. daxil idi. Eyni zamanda, “PAŞA Holding” və onun törəmə şirkətləri tərəfindən zəlzələdən zərər çəkmiş şəxslərə dəstək məqsədilə Türkiyənin yardım fondları - AHBAP-ın və Türkiyənin Daxili İşlər Nazirliyinin Təbii Fəlakət və Fövqəladə Hallar Agentliyinin (AFAD) hər birinə 500 min dollar olmaqla ümumilikdə 1 milyon dollar ianə edilib. Bundan başqa, bir çox dövlət şirkətləri də, o cümlədən “AzərEnerji” ASC və “Azərişıq” ASC Mehriban Əliyevanın təşəbbüsünə qoşulub. Hazırda Azərbaycandan qardaş ölkəyə yardım göstərilməsi davam edir.
Azərbaycanın birinci xanımı Mehriban Əliyevanın bu nəcib təşəbbüsünə qoşularaq TUMİB, Müstəqil Sənayeçi və İş Adamları Dərnəyi (MÜSİAD), Azərbaycan Sahibkarlar Konfederasiyası, Gəncliyə Yardım Fondu və bir neçə qeyri-hökumət təşkilatları ilə birlikdə “Qardaş köməyi” platforması yaradılıb. Bu platforma tərəfindən indiyədək qida məhsulları, geyimlər, tibbi ləvazimatlar və digər zəruri avadanlıqlarla dolu 40-dan çox yük maşını yola salınıb və bu yardımlar davam edir.
Azərbaycanın Birinci vitse-prezidenti Mehriban Əliyeva hazırda təbii fəlakət zonasında çalışan xilasedicilərimizə, tibb işçilərinə, diplomatik korpusumuzun əməkdaşlarına, hadisələri işıqlandıran media nümayəndələrinin əməyinə yüksək qiymət verib, onlara, yardım kampaniyalarında iştirak edən vətəndaşlarımıza təşəkkürünü bildirib. Bu isə Azərbaycanın Birinci vitse-prezidentinin Azərbaycan xalqının milli birlik və həmrəylik nümayiş etdirməsinə bütün türk dünyasının yaşadığı faciəyə insanlarımızın yanğısına, dəstəyinə verdiyi yüksək dəyərdir.
TUMİB adından təbii fəlakət zamanı həlak olanların ailələrinə və yaxınlarına, qardaş Türkiyə xalqına başsağlığı verir, xəsarət alanların tezliklə sağalmasını və zəlzələnin nəticələrinin tezliklə aradan qaldırılmasını arzulayıram”, - deyə İctimai Birliyin sədri qeyd edib.
Bölmənin digər xəbərləri
