Türkiyə Prezidenti: Millətin gələcəyi naminə tarixi addımlar atırıq
Bakı, 5 avqust, AZƏRTAC
Prezident Rəcəb Tayyib Ərdoğan çərşənbə axşamı, avqustun 5-də Ali Hərbi Şuranın illik toplantısına sədrlik etməzdən əvvəl bildirib ki, Türkiyə millətin gələcəyini qorumaq üçün tarixi addımlar atır.
AZƏRTAC Anadolu agentliyinə istinadla xəbər verir ki, toplantıdan əvvəl müasir Türkiyənin qurucusu Mustafa Kamal Atatürkün məqbərəsində yazdığı mesajı yüksək səslə oxuyan Ərdoğan deyib: “Bizə qarşı qurulan tələlərə, həm daxildən, həm də ölkənin hüdudlarından kənardan edilən hücumlara baxmayaraq, yenidən formalaşan qlobal nizam çərçivəsində Türkiyəni regionda lider dövlət etmək uğrunda mübarizəmiz davam edir.
Biz təhlükəsizlikdən demokratiyaya, iqtisadiyyatdan texnologiyaya, müdafiə sənayesindən xarici siyasətə qədər bütün sahələrdə millətimizin gələcəyini qorumaq naminə tarixi addımlar atırıq”.
Ali Hərbi Şuranın üzvləri ilə birlikdə Atatürkün məzarını ziyarət edən Prezident Ərdoğan əlavə edib: “İnanırıq ki, şuramızın 2025-ci il toplantısı Türkiyə əsri vizyonuna doğru gedən yolda yeni bir mərhələ olacaq”.
Rəcəb Tayyib Ərdoğan, həmçinin Atatürkün və “millətin gələcəyi üçün” canlarını fəda edən bütün qəhrəmanlara dərin ehtiramını ifadə edib.
Bölmənin digər xəbərləri
