Türkiyədə beş bələdiyyə sədri vəzifəsindən uzaqlaşdırılıb
İstanbul, 5 iyun, Günel Karatepe, AZƏRTAC
İstanbul Respublika Baş Prokurorluğunun rüşvətalma və zor tətbiqetmə yolu ilə mənimsəmə cinayətləri ilə bağlı apardığı istintaq çərçivəsində Türkiyədə həbs edilən bələdiyyə sədrlərindən beşi vəzifəsindən uzaqlaşdırılıb.
AZƏRTAC xəbər verir ki, bununla bağlı Türkiyənin Daxili İşlər Nazirliyi məlumat yayıb.
Bildirilib ki, İstanbulun Avcılar, Büyükçekmece, Qaziosmanpaşa, Adananın Ceyhan və Seyhan bələdiyyələrinin sədrləri müvəqqəti tədbir olaraq vəzifələrindən kənarlaşdırılıblar.
İstanbul Respublika Baş Prokurorluğu, həmçinin Türkiyənin müxalif Cümhuriyyət Xalq Partiyasının (CHP) sədri Özgür Özəllə bağlı istintaqa başlandığını bildirib. İstintaq işi “məhkəmə orqanında vəzifəsini yerinə yetirən şəxsin vəzifəsinin icrasına mane olmaq məqsədilə təhdid etmək” və “dövlət məmurunu vəzifəsi ilə əlaqədar açıq-aşkar təhqir etmək” maddələri üzrə açılıb. Bu, CHP sədrinin İstanbulun Qaziosmanpaşa rayonunda keçirilən mitinq zamanı İstanbulun Baş prokuroru Akın Gürlekə qarşı işlətdiyi ifadələrlə bağlıdır.
Bölmənin digər xəbərləri
