DÜNYA
TÜRKİYƏNİN AVROPA BİRLİYİNƏ DAXİL OLMASI AVROPANIN İSLAM DÜNYASINDA MÖVQELƏRİNİ XEYLİ MÖHKƏMLƏNDİRƏ BİLƏR
Türkiyənin Avropa Birliyinə daxil olması “sivilizasiyaların toqquşması” probleminin həllinə kömək edər, islam dünyasında Avropanın mövqelərini xeyli möhkəmləndirərdi. AZƏRTAC-ın İTAR-TASS agentliyindən aldığı xəbərə görə, bunu Türkiyənin Baş naziri Rəcəb Tayyib Ərdoğan Londonun “Tayms” qəzetinə müsahibəsində bildirmişdir. O demişdir: “Biz Avropa Birliyinə iqtisadi ittifaq və ya xristian klubu kimi deyil, siyasi dəyərlər birliyi kimi baxırıq. Biz Avropa Birliyini sivilizasiyaların toqquşduğu yox, görüşdüyü məkan kimi qəbul edirik”.
Baş nazirin sözlərinə görə, Türkiyənin Avropa Birliyinə üzv qəbul edilməsi bu təşkilatın müəyyən dinlər və ya iqtisadi maraqlar birliyi olması barədə fikirlərə də son qoyardı.
Bu həftə İstanbulda səfərdə olan Böyük Britaniyanın xarici işlər naziri Cek Stro bildirmişdir ki, Türkiyə insan hüquqları sahəsində çox böyük tərəqqi əldə etmişdir. Bu isə Avropa Birliyinin Ankaraya başlıca tələbidir. C.Stro demişdir ki, London Türkiyənin Avropa Birliyinə üzvlüyünü dəstəkləməyə hazırdır.