Türkiyənin Qara dəniz bölgəsində sel və torpaq sürüşməsi nəticəsində dəyən ziyan qiymətləndirilir
Ankara, 21 sentyabr, AZƏRTAC
Türkiyənin şimal-şərqində yağan leysan yağışları ölkənin Qara dəniz bölgəsində torpaq sürüşməsinə səbəb olub.
AZƏRTAC xəbər verir ki, Türkiyə Meteorologiya İdarəsi Artvin, Giresun, Rizə və Trabzon vilayətlərində leysan yağışlarının davam edəcəyi təhlükəsi ilə bağlı xəbərdarlıq edib.
Türkiyədə 343 yaşayış məntəqəsi ilə əlaqə kəsilib, 26 yolda torpaq sürüşmələri baş verib, bir neçə körpü dağılıb və ya zədələnib. Ölən və yaralananlar olmayıb.
Türkiyənin nəqliyyat və infrastruktur naziri Abdulkadir Uraloğlu və gənclər və idman naziri Osman Aşkan Bak Rizə vilayətinə gələrək təbii fəlakət bölgəsindəki vəziyyətlə tanış olublar.
Yolların, elektrik və su təchizatının bərpası istiqamətində işlərə başlanılıb. Ekspertlər dəymiş ziyanı qiymətləndirirlər. Xilasedicilər və jandarma əməkdaşlarının Tunca rayonunda su basmış evlərdən insanları təxliyə etdiyi Rize vilayətində vəziyyət çətin olaraq qalır. Bəzi hallarda xilasetmə əməliyyatları üçün tikinti texnikasından istifadə olunub. Bəzi binalar dağılıb.
Səlahiyyətlilər təbii fəlakətin ilkin xilasetmə işləri üçün artıq 4 milyon türk lirəsi ayrıldığını açıqlayıb.
Mütəxəssislərin hesablamalarına görə, təkcə son 24 saat ərzində Türkiyənin Şərqi Qara dəniz bölgəsində hər kvadratmetrə 272 kq yağıntı düşüb.
Ramin Abdullayev
AZƏRTAC-ın xüusi müxbiri
Ankara
Bölmənin digər xəbərləri
