Türkmənistan Prezidentinin Azərbaycana səfəri münasibətlərin inkişafında mühüm hadisədir ŞƏRH
Bakı, 25 iyun, AZƏRTAC
Tarixi baxımdan Azərbaycan və türkmən xalqları ortaq türk köklərinə, dil və mədəniyyət yaxınlığına malikdirlər. "İpək yolu"nun müxtəlif dövrlərində xalqlar arasında iqtisadi, ticarət və mədəni əlaqələr formalaşıb. Sovet İttifaqının tərkibində olduqları dövrdə də münasibətlər davam edib, 1991-ci ildə müstəqillik əldə etdikdən sonra isə dövlətlərarası əməkdaşlıq yeni mərhələyə qədəm qoyub.
Bu sözləri AZƏRTAC-a açıqlamasında politoloq Yalçın Hacızadə söyləyib.
O bildirib ki, müasir diplomatik münasibətlərin təməli 1992-ci ildə qurulub. İlk illərdə Xəzər dənizinin hüquqi statusu və enerji yataqları ilə bağlı müəyyən fikir ayrılıqları mövcud olsa da, sonrakı dövrdə qarşılıqlı siyasi dialoqla bu məsələlərin əksəriyyətinin həllinə imkan yarandı. Xüsusilə “Dostluq” yatağı üzrə əldə olunan razılaşma iki ölkə arasında etimadın möhkəmlənməsinin mühüm nümunəsi oldu.
"Son illərdə Prezident İlham Əliyev və Türkmənistan rəhbərliyi arasında yüksəksəviyyəli təmaslar münasibətlərin dinamik inkişafına ciddi təkan verib. 2017-ci ildə imzalanmış Strateji Tərəfdaşlıq haqqında Bəyannamə ilə münasibətlərimiz keyfiyyətcə yeni mərhələyə yüksəldi",- deyə Y.Hacızadə qeyd edib.
Politoloq deyib ki, Türkmənistan Prezidenti Sərdar Berdiməhəmmədovun Azərbaycana son dövlət səfəri münasibətlərin inkişafında mühüm hadisə kimi qiymətləndirilə bilər. Səfər zamanı Prezident İlham Əliyev ilə keçirilən görüşlərdə siyasi, iqtisadi, nəqliyyat, logistika, enerji və humanitar sahələr üzrə əməkdaşlığın genişləndirilməsi müzakirə olundu. Səfər çərçivəsində müxtəlif sənədlərin imzalanması ilə yanaşı, Prezidentlər Füzuli və Şuşaya səfər etdilər.
"İkitərəfli münasibətlərin əsas istiqamətlərindən biri enerji əməkdaşlığıdır. Türkmənistan dünyanın ən böyük təbii qaz ehtiyatlarına malik ölkələrdən biridir. Azərbaycan isə enerji resurslarının dünya bazarlarına çıxarılması üçün mühüm nəqliyyat və enerji dəhlizlərinə sahibdir. Bu baxımdan Trans-Xəzər enerji layihələri gələcək əməkdaşlığın ən perspektivli sahələrindən biri hesab olunur.
Nəqliyyat-logistika sahəsində əməkdaşlıq da xüsusi əhəmiyyət daşıyır. Orta Dəhliz layihəsi çərçivəsində Azərbaycan və Türkmənistan Avropa ilə Asiya arasında yükdaşımaların artırılmasında mühüm rol oynayırlar. Bakı Beynəlxalq Dəniz Ticarət Limanı ilə Türkmənbaşı Beynəlxalq Dəniz Limanı arasında əməkdaşlıq regionun tranzit potensialını əhəmiyyətli dərəcədə artırır. Gələcək perspektivlərə gəldikdə isə Azərbaycan–Türkmənistan münasibətlərinin daha da dərinləşəcəyi gözlənilir. Enerji təhlükəsizliyi, nəqliyyat dəhlizləri, rəqəmsal iqtisadiyyat, yaşıl enerji, liman infrastrukturu və logistika sahələrində yeni layihələrin həyata keçirilməsi mümkündür. Eyni zamanda, Xəzər regionunda sabitliyin qorunması və türk dövlətləri arasında inteqrasiyanın güclənməsi iki ölkənin əməkdaşlığını daha strateji xarakterə çevirəcək", - deyə o vurğulayıb.
Bölmənin digər xəbərləri
