Bakı, 2 sentyabr, AZƏRTAC

Azərbaycan millisinin İsveç yığması ilə Bakıda keçirəcəyi UEFA Millətlər Liqasının I tur oyununun hakim təyinatları açıqlanıb.

AZƏRTAC AFFA-nın rəsmi saytına istinadən xəbər verir ki, qarşılaşmanı Macarıstandan olan hakimlər briqadası idarə edəcək.

Görüşün baş hakimi Balaş Berkeydir. Ona Vensel Tot və Balaş Szert kömək edəcəklər. Dördüncü hakim funksiyasını isə Ksaba Pinter yerinə yetirəcək.

Qeyd edək ki, Azərbaycan seçməsi C liqasının I qrupu çərçivəsində sentyabrın 5-də Tofiq Bəhramov adına Respublika Stadionunda İsveçlə, sentyabrın 8-də isə Koşitse Futbol Arenasında Slovakiya ilə qarşılaşacaq. Hər iki oyun eyni vaxtda – saat 20:00-da başlayacaq.