UFC Təhsil Mərkəzinin 12-ci məzun buraxılışı qeyd olunub
Bakı, 7 iyul, AZƏRTAC
İyulun 7-də Beynəlxalq Muğam Mərkəzində University Foundation Courses (UFC) Təhsil Mərkəzinin 12-ci məzun buraxılışına həsr olunmuş təntənəli mərasim keçirilib.
AZƏRTAC xəbər verir ki, tədbirdə dövlət rəsmiləri, Milli Məclisin deputatları, ali təhsil müəssisələrinin rəhbərləri, məktəb direktorları, diplomatik korpusun nümayəndələri, eləcə də məzunlar və onların valideynləri iştirak ediblər.
Mərasimin fəxri qonaqları sırasında ABŞ, Böyük Britaniya, Fransa, Belçika, Niderland Krallığı, Macarıstan, Çexiya, Mərakeş, Meksika, Kolumbiya, Yunanıstan, Qırğızıstan və Çinin Azərbaycandakı səfirləri və səfirlik nümayəndələri yer alıblar.
Tədbirdə çıxış edən UFC-nin təsisçisi və direktoru, fəlsəfə doktoru Reyhan Hüseynova bildirib ki, son 12 il ərzində UFC yüzlərlə gəncin dünyanın nüfuzlu universitetlərinə qəbul olunmasına və beynəlxalq akademik mühitə uğurla inteqrasiya etməsinə töhfə verib. Onun sözlərinə görə, UFC yalnız xaricdə təhsilə hazırlıq mərkəzi deyil, eyni zamanda gənclərin analitik düşüncə, tədqiqat, ünsiyyət və liderlik bacarıqlarını inkişaf etdirən beynəlxalq təhsil mərkəzidir.
"Biz hər bir məzunumuzun uğurunu Azərbaycanın uğuru kimi qiymətləndiririk. Məqsədimiz gəncləri sadəcə universitetə qəbul etdirmək deyil, onların qlobal mühitdə rəqabət apara bilən, bilikli və məsuliyyətli mütəxəssislər kimi formalaşmasına dəstək olmaqdır", – deyə Reyhan Hüseynova vurğulayıb.
Bildirilib ki, Azərbaycanda təhsil və elm sahəsinə göstərilən dövlət qayğısı gənclər üçün yeni imkanlar yaradır. Ulu Öndər Heydər Əliyevin əsasını qoyduğu təhsil siyasəti Prezident İlham Əliyevin rəhbərliyi ilə uğurla davam etdirilir. Birinci vitse-prezident Mehriban Əliyeva təhsilin inkişafına və gənclərin hərtərəfli yetişməsinə mühüm töhfələr verir.
Qeyd olunub ki, UFC Azərbaycanda Böyük Britaniyanın “British Foundation” proqramını həyata keçirmək üçün akkreditasiya və lisenziya almış ilk təhsil mərkəzidir. Bildirilib ki, mərkəz fəaliyyətini davamlı olaraq genişləndirərək bu gün Böyük Britaniya, Fransa və Almaniya departamentləri ilə yanaşı, Asiya Departamentini də yaradıb. Yeni departament çərçivəsində tələbələr Yaponiya, Çin və Cənubi Koreyanın aparıcı universitetlərinə qəbul üçün beynəlxalq standartlara uyğun hazırlıq keçəcəklər. Bu addım UFC-nin qlobal təhsil imkanlarını daha da genişləndirərək tələbələrə dünyanın müxtəlif ölkələrində ali təhsil almaq üçün yeni perspektivlər təqdim edir.
Tədbirdə Mərakeşin ölkəmizdəki səfiri Məhəmməd Adil Embarş, ABŞ-ın ölkəmizdəki səfirliyinin müvəqqəti işlər vəkili Emi Karlon, Fransanın ölkəmizdəki səfiri Sofi Laqut və digər çıxış edənlər UFC-nin beynəlxalq əməkdaşlıq əlaqələrini, təhsil sahəsində qazandığı uğurları və məzunlarının nailiyyətlərini yüksək qiymətləndirərək gənclərə gələcək həyat və karyeralarında uğurlar arzulayıblar.
Sonra məzunlara diplomlar təqdim olunub. 2026-cı il buraxılışının məzunları Böyük Britaniya, ABŞ, Fransa, Almaniya, Niderland, İtaliya, İspaniya, Belçika, Macarıstan, Çexiya, Litva, Birləşmiş Ərəb Əmirlikləri və Çinin aparıcı ali təhsil müəssisələrinə qəbul olublar.
Bu ali təhsil müəssisələri sırasında London Kral Kolleci, Qlazqo Universiteti, Kraliça Meri Universiteti, Nyu-York Universiteti, Harvard Universiteti, Vaşinqton Amerika Universiteti, Milan Universiteti, Amsterdam Universiteti, Barselona Beynəlxalq Araşdırmalar İnstitutu və digər nüfuzlu ali təhsil müəssisələri yer alır.
On iki il ərzində formalaşdırdığı beynəlxalq təhsil modeli ilə UFC bu gün də Azərbaycan gənclərinin dünyanın aparıcı universitetlərinə gedən yolunda etibarlı tərəfdaş kimi fəaliyyətini davam etdirir.
Müxbir - Xatirə Cəfərova
Bölmənin digər xəbərləri
