AZƏRTAC-ın Ukrinform agentliyindən aldığı xəbərə görə, Prezident Viktor Yuşşenko ölkə vətəndaşlarını Beynəlxalq ana dili günü münasibətilə təbrik etmişdir. Müraciətdə deyilir ki, hazırda Ukrayna dili böyük Avropa millətinin dili statusunu özünə qaytarır. Prezident vurğulamışdır: “Ukrayna kəlməsi məğrur səslənir. Doğma dilimiz dünyanın ən uca kürsülərindən səslənir, ona heyran qalır, ayaq üstündə alqışlayırlar. Əminəm ki, ana dilinə hörmətlə yanaşan xalq qonşusunun dilinə də hörmət bəsləyəcəkdir. Ukrayna bir çox millətlərin nümayəndələri üçün doğma evə çevrilmişdir. Biz ölkədəki dillərin müxtəlifliyinə görə məsuliyyətimizi anlayır və vətəndaşlarımızın mədəni özgürlüyünün saxlanılması və inkişafı naminə əlimizdən gələni etməyə hazırıq. Ukraynada ictimai həmrəyliyin və demokratiyanın inkişafının rəhni bundadır”.
Ölkənin Konstitusiyasına uyğun olaraq, dövlət dili Ukrayna dilidir. Lakin rus dilinin və digər milli azlıqların dillərinin azad inkişafına, istifadə olunmasına və müdafiəsinə təminat verilir. Dillər haqqında qanun hər kəsin dövlət qurumlarına və digər qurumlara öz dillərində müraciət etmək hüququnu tanıyır, dili bilmədiyi üçün müraciəti qəbul etməkdən və ona baxmaqdan boyun qaçıran məmurların məsuliyyətini müəyyənləşdirir.
