Ukrayna Prezidenti Denis Şmıqalı müdafiə naziri vəzifəsinə irəli sürüb
Kiyev, 14 iyul, AZƏRTAC
Rustem Umerovun yerinə Ukraynanın Baş naziri Denis Şmıqal yeni müdafiə naziri ola bilər.
Bu barədə AZƏRTAC Ukrayna Prezidenti Volodimir Zelenskinin axşam müraciətinə istinadla məlumat yayıb.
Zelenski xatırladıb ki, bu gün o, Baş nazirin birinci müavini Yuliya Sviridenkaya hökumətə rəhbərlik etməyi və onun işini “Ukrayna istehsalına, Ukrayna sahibkarlığına dəstək təcrübəsi əsasında” yeniləməyi təklif edib.
“İndiki Baş nazir Denis Şmıqalın nəhəng təcrübəsi Ukraynanın müdafiə naziri vəzifəsində mütləq faydalı olacaq – məhz bu sahədə hazırda ölkədə maksimum resurslar, maksimum tapşırıqlar və böyük məsuliyyət var”, - deyə Zelenski vurğulayıb.
Prezident əlavə edib ki, Nazirlər Kabinetinin yeni konfiqurasiyasına deputatların kifayət qədər dəstəyinə ümid edir. Həmçinin Zelenskinin sözlərinə görə, hökumətin Ukrayna ilə tərəfdaşları arasında bütün razılaşmaların tez bir zamanda auditini aparması vacibdir.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
