Ukraynadakı azərbaycanlılar yerli hakimiyyət orqanlarına seçkilərdə namizədliklərini irəli sürüblər
Kiyev, 24 oktyabr, AZƏRTAC
Ukraynada yaşayan soydaşlarımız oktyabrın 25-də bu ölkədə keçiriləcək yerli hakimiyyət orqanlarına seçkilərdə namizədliklərini irəli sürüblər.
AZƏRTAC xəbər verir ki, ilk dəfədir azərbaycanlılar çox sayda şəhər və vilayət şuralarında deputatlığa namizədliklərini veriblər. Belə ki, Kiyev, Odessa, Dnepropetrovsk, Nikolayev, Poltava, Vinnitsa, Sumı, Çerniqov, Herson vilayətlərindən 20-dən çox azərbaycanlı seçkilərdə iştirak edir. Onlar seçki kampaniyası dövründə fəal təbliğat-təşviqat işləri ilə məşğul olublar.
Qeyd edək ki, seçkilərdə oktyabrın 24-də “sükut günü” elan edilib. Ukrayna polisi sentyabrın 5-dən başlayan seçki prosesi dövründən bu günə qədər seçki qanunvericiliyinin pozulmasına görə 622 cinayət işi açıb. Ümumilikdə isə seçki qanunvericiliyinin pozulması hallarına görə 7877 müraciət araşdırılıb.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
