Ülvi Mehdiyev: Hər bir azərbaycanlı “YAŞAT” Fondunun ictimai nəzarətçisi olacaq
Bakı, 8 dekabr, AZƏRTAC
“YAŞAT” Fonduna ümumi nəzarəti həyata keçirmək üçün Prezident İlham Əliyevin Sərəncamı ilə 11 nəfərlik Himayəçilik Şurası yaradılıb. Lakin elə bir sistem, portal qurulacaq ki, 50 milyonluq hər bir azərbaycanlının bu Fonda nəzarət etmək imkanı olacaq.
AZƏRTAC xəbər verir ki, bunu Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev deyib.
Onun sözlərinə görə Fonda ictimai nəzarət bütün azərbaycanlıların iştirakı ilə olacaq: “İstənilən şəxs Fondun rəsmi internet səhifəsinə daxil olub, onun fəaliyyəti ilə bağlı hesabatı görə biləcək. İstəyirsə, sorğu göndərib hesabatla bağlı daha detallı məlumat ala biləcək. Elektron sistem, portal elə qurulacaq ki, hər bir vətəndaş bu Fondun ictimai nəzarətçisi olacaq. Çünki bu Fonda göndərilən ianələrin təyinatı bizim üçün son dərəcə məsuliyyətlidir. “ASAN xidmət” olaraq bu işi maksimum dərəcədə şəffaflıqla həyata keçirəcəyik. Fondun xərcləri tam şəffaf formada müəyyən edilməli, ünvana çatmalı və bunu hər kəs görə bilməlidir”.
Azərbaycan Respublikasının ərazi bütövlüyünün müdafiəsi ilə əlaqədar yaralananların və şəhid ailələrinin təminatına dəstək fondu - “YAŞAT” Fondu Azərbaycan Respublikasının Prezidenti İlham Əliyevin 2020-ci il 8 dekabr tarixli Fərmanı əsasında yaradılıb.
Bölmənin digər xəbərləri
