Ülviyyə Qənbərova: Fizika olmadan müasir texnologiyalardan danışmaq mümkün deyil
Bakı,11 sentyabr, AZƏRTAC
Müasir texnologiyaların, süni intellektin və robototexnikanın sürətli inkişafı fundamental elmlərin, xüsusilə fizikanın əhəmiyyətini daha da artırır. Fizika elmi həm yeni texnologiyaların yaradılmasının, həm də gələcəyin peşələrinə hazırlığın əsasını təşkil edən mühüm elm sahələrindən biridir.
Bu fikirləri 16 nömrəli Texniki Humanitar Fənlər Liseyinin fizika müəllimi Ülviyyə Qənbərova AZƏRTAC-a açıqlamasında bildirib. O, fizika elminin müasir texnologiyaların, süni intellektin, robototexnikanın və digər innovativ istiqamətlərin inkişafındakı rolundan danışıb. Bildirib ki, fizika kainatın sirlərinin öyrənilməsində mühüm əhəmiyyət daşıyan fundamental elmlərdən biridir: “Fizika elmi olmadan müasir texnologiyaların inkişafını təsəvvür etmək mümkün deyil. Bu gün fizikanın müxtəlif bölmələri süni intellekt, robototexnika və digər yüksək texnologiyaların formalaşmasında mühüm rol oynayır. Ən sadə nümunə kimi gündəlik həyatımızda istifadə etdiyimiz cihazları göstərmək olar. İstər mexaniki, istərsə də elektriklə işləyən bütün bu qurğular fizika qanunları əsasında yaradılıb. Əsrlər boyu alimlər təbiətdə baş verən prosesləri müşahidə edib, əldə etdikləri bilikləri texnologiyaya tətbiq ediblər. Bu gün texnologiyanın belə sürətlə inkişaf etməsi də məhz həmin fundamental qanunlara əsaslanır. Yaxın illərdə əmək bazarında robototexnika, proqramlaşdırma və mühəndislik istiqamətləri üzrə ixtisaslaşmış mütəxəssislərə tələbatın daha da artacağı gözlənilir”.
Müsahibimiz vurğulayıb ki, robotların hazırlanması və idarə olunması, proqram təminatının yaradılması, robot sənayesində mühəndislik bacarıqları gələcəyin əsas istiqamətləri sırasında olacaq. Proqramlaşdırma ilk baxışdan daha çox rəqəmsal bacarıq kimi görünsə də, onun arxasında fizika elminin fundamental prinsipləri dayanır. Buna görə də gələcəyin peşələrinə hazırlaşan şagirdlər üçün fizika mühüm baza fənlərindən biri olaraq qalacaq.
Müəllim müasir nəslin öyrənmə vərdişlərinin əvvəlki dövrlərdən ciddi şəkildə fərqləndiyini də diqqətə çatdırıb: “Texnologiya ilə böyüyən uşaqlar informasiyanı daha sürətli əldə edir və ənənəvi öyrənmə üsullarından əlavə, vizual və interaktiv tədris mühitinə üstünlük verirlər. Əvvəllər biz məlumatları əsasən kitablardan oxuyur, araşdırır və dərk etməyə çalışırdıq. Bu isə daha çox vaxt tələb edirdi. İndi isə uşaqlar bir neçə toxunuşla internet vasitəsilə çoxsaylı məlumat əldə edə bilirlər. Hər şey daha sürətli baş verir. Buna görə də müasir şagirdlər yalnız dinləməklə deyil, görərək, araşdıraraq və özləri kəşf edərək öyrənməyə üstünlük verirlər. Müəllimlər də tədris metodlarını yeni nəslin maraq və tələbatlarına uyğunlaşdırmalıdırlar”.
Ülviyyə Qənbərova bildirib ki, dərslərdə internet resurslarından geniş istifadə olunur, şagirdlərə hazır məlumat təqdim etmək əvəzinə onlara istiqamət verilir və müstəqil araşdırma aparmaları təşviq edilir. Artıq internet və texnologiyadan kənar təhsil mühitini təsəvvür etmək çətindir. Əsas məqsəd texnologiyadan yalnız məlumat əldə etmək üçün deyil, şagirdlərin müstəqil düşünmə, araşdırma və yeni biliklər kəşf etmə bacarıqlarının inkişafı üçün istifadə etməkdir.
Müxbir - Tünzalə Arazlı
Bölmənin digər xəbərləri
