UNICEF Gürcüstana 129 min 600 doza “AstraZeneca” vaksini çatdırmağa köməklik göstərəcək
Tbilisi, 12 mart, AZƏRTAC
UNICEF koronavirusa qarşı mübarizə tədbirləri çərçivəsində Gürcüstana 129 min 600 doza “AstraZeneca” vaksini çatdırmağa köməklik göstərəcək.
AZƏRTAC xəbər verir ki, bu barədə UNICEF-in Gürcüstan nümayəndəliyi məlumat yayıb.
Məlumatda bildirilir ki, peyvəndin Koreya Respublikasının istehsalı olan “AstraZeneca-SKBio” növünün ilk partiyası martın 13-də Gürcüstana gətiriləcək və istirahət günlərində ölkənin bütün regionlarına paylanılacaq. Martın 15-də Gürcüstanda vaksinasiya prosesinə başlanılacaq.
İlkin olaraq ölkəyə 43 200 doza gətiriləcək və peyvəndin hamısı yalnız birinci doza üçün nəzərdə tutulub. Aprel ayında isə daha 86 min 400 doza gətiriləcək.
Gürcüstan hökuməti, eyni zamanda, “Pfizer-Bioentec” vaksininin alınmasına köməklik göstərilməsi üçün UNICEF-ə müraciət edib. UNICEF bu istiqamətdə də yardımını əsirgəməyəcək və “Pfizer” vaksininin martın sonunda Gürcüstana gətiriləcəyi gözlənilir.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
