ÜST “Johnson & Johnson” peyvəndinin təcili istifadəsinə icazə verib
Cenevrə, 13 mart, AZƏRTAC
Ümumdünya Səhiyyə Təşkilatı (ÜST) ABŞ-ın “Johnson & Johnson” şirkətinin koronavirus əleyhinə peyvəndinin təcili istifadəsinə icazə verib.
AZƏRTAC xəbər verir ki, beynəlxalq qurumun Ekspertlər Şurasının tövsiyəsinə müvafiq olaraq peyvəndin beynəlxalq istifadəsi lisenziyalaşdırılıb. Təşkilatın Baş direktoru Tedros Qebreyesus bildirib ki, COVID-19-a qarşı hər bir yeni, təhlükəsiz və təsirli vasitə pandemiya üzərində nəzarətin mümkünlüyü istiqamətində atılmış növbəti addımdır.
Qeyd edilməlidir ki, Avropa İttifaqı da Avropa Dərman Agentliyinin (EMA) tövsiyəsi əsasında peyvəndin istifadəsinə icazə verib. Tədqiqatlar əsasında “Johnson & Johnson” şirkətinin koronavirus əleyhinə peyvəndinin COVID-19 xəstəliyini ağır formada keçirən xəstələrin 85 faizinə müsbət təsir göstərdiyi müəyyən edilib. Viral vektor peyvəndinin üstünlükləri arasında onun cəmi bir dozadan ibarət olması və normal soyuducularda saxlana bilməsi göstərilir.
Elgün Niftəli
AZƏRTAC-ın xüsusi müxbiri
Cenevrə
Bölmənin digər xəbərləri
