Bakı, 16 may, Anara Axundova, AZƏRTAC

AZƏRTAC Azərbaycanda fəaliyyət göstərən yoqa mütəxəssisləri ilə müsahibələr silsiləsini davam etdirir. Növbəti həmsöhbətimiz Sibirdən olan FYSM-yoqa istiqaməti üzrə yoqa müəllimi, şaman təbabəti və masajı sahəsində mütəxəssis, qadın praktikalarının ustası Vera Aksamentovadır.

- Vera, sizin üçün yoqa nə deməkdir?

- Mənim üçün yoqa həyata aydın baxışdır, sağlam və güclü vəziyyətdir: əqli, fiziki və mənəvi. Bu, öz ruhuna gedən yoldur. Bədən, materiya vasitəsilə daxilinə nüfuz edirsən və artıq orada möhtəşəm bir səyahət, özünü dərketmə baş verir. bunun açarı yoqadır. Mənim bir şüarım var: yoqa vasitəsilə özünü dərk et, yoqa vasitəsilə özünü kəşf et.

Çünki məhz təcrübə vasitəsilə sən özünü kəşf edirsən – və bu, çoxşaxəlidir! Bu, heyrətamiz bir alətdir! Mənə elə gəlir ki, yoqa məktəblərdə tədris olunmalıdır ki, insanlar uşaqlıqdan özlərini dərk etməyə başlaya bilsinlər.

- Necə oldu ki, yoqa ilə məşğul olmağa başladınız? Bu yol necə idi?

- Hindistandan həmişə xoşum gəlib. Uşaqlıqdan. Reinkarnasiyaya inansaq, yəqin ki, mənim bu torpaqlarla əlaqəm olub. 2014-cü ildən yoqa məni müşayiət edir. Anladım ki, məşqdən sonrakı vəziyyətim yoqasız olduğundan daha maraqlı, daha dərin, daha aydın və daha dəqiqdir. Lakin mən usta axtarışında idim. Bir gün İnstaqrama girib sonradan mənim müəllimim olmuş usta Yevgeni Panovun canlı yayımına rast gəldim.

Beləliklə, mən canlı yayıma baxıram və arxamda yoqa xalçası var. Onu götürüb, məşğul olmağa başlayıram... Başa düşürəm ki, bu yeni dünyadır, köhnəsi isə artıq mənim üçün maraqlı deyil. Mən yoqaya qərq oluram və başa düşürəm ki, o mənə aiddir, mən həmişə bunu gözləmişəm. Tələbə yetişəndə isə müəllim də gəlir. Sonra özüm öyrətməyə başladım.

- İstiqamətiniz haqqında danışın.

- Ümumiyyətlə, yoqa qədim mənəvi ənənədir, əvvəllər bu barədə heç də hamıya məlumat verilmirdi. Qədim kitablarda deyilirdi ki, yoqa ilə məşğul olan insanlardan hətta qorxurdular, çünki onlar ruhi cəhətdən çox “zəngin” idilər. Həftədə 3-5 dəfə intensiv məşq edəndə özümdə də qeyri-adi hallar müşahidə edirəm. Məsələn, görürəm ki, dərhal istəklərimin nümayiş etdirilməsi baş verir - istədiyim hər şey mənə gəlir. Hətta hansısa anda məyusluqla üzləşdim və dedim ki, bəlkə yoqa mənim üçün deyil. Həmin vaxt müəllimlə rastlaşdım və artıq yoqa prosesi başladı. Bu istiqamət FYSM yoqa – “Fresh Yoga Synthesized Methodology” adlanır. Bunun əsasını məşhur yoqa ustası İqor Kovalev qoyub. Bu, 15 il ərzində formalaşmış və müasir insanın ehtiyaclarına uyğunlaşdırılmış təhlükəsiz və effektiv təlim metodlarını özündə birləşdirən səkkiz komponentli yoqa anlayışıdır. FYSM üç prinsipə əsaslanır: səmərəli, ehtiyatla və təhlükəsiz. Onun aktuallığı məhz bundadır.

- Siz çox maraqlı fikir səsləndirdiniz - təcrübələr sayəsində istəklərin nümayiş etdirilməsini yaşadığınızı söylədiniz. Bu mənim yoqa mövzusunda ilk müsahibəm deyil və digər müsahiblərim də davamlı olaraq bu haqda danışır... Bunun necə işlədiyini izah edə bilərsinizmi?

- Hər şey enerjidir. Enerji sərf etdiyin üçün daha da yaxşı enerji əldə edirsən. Əgər enerjimi sərf edirəmsə, güc verirəmsə, fiziki, zehni gərginliyim varsa, o zaman əsl psixofiziki magiya baş verir – enerjilər simbiozu baş verir. Arzum varsa, o həqiqidirsə, qəlbdən gəlirsə, o zaman gerçəkləşir. Mənim elə möcüzələrim olub ki, onları insanlara danışa biləcəyimi belə bilmirəm. Həqiqətən səylərinin bəhrəsini verdiyini görəndə daha da yaxşı məşq etməyə çalışırsan. İndi getdikcə daha çox insan hər şeyin enerji olduğunu başa düşür. Hər şey əvvəl bir niyyətdir və əgər sən onu düşünürsənsə, həm də ona fiziki və zehni güc tətbiq edirsənsə və bu, ruhunun istəyi ilə üst-üstə düşürsə, bütün məkan sənin üçün işləməyə başlayır.

- Vera, sizcə, yoqa niyə dünyada bu qədər populyarlaşıb?

- Çünki sən bədənsən. Ən asan şey xalçanı açmaqdır və sən iki-ikiyə olan sahədə özünlə görüşürsən və otaqdan çıxmadan bütün dünyanı kəşf edirsən. Sən sadəcə olaraq cəmi bir saat yarım məşq ərzində başqa planetə uçub geri qayıdırsan. Orada çoxlu kəşflər baş verir! Sən guya ki, yerindən tərpənməmisən, sadəcə reallıq adasında, xalçanın üstündə idin, amma nəhəng bir təcrübə yaşadın.

Bu gün hər kəs sağlam bədən, möhkəm bədən, aydın ruh, biliyə can atır. Xalçada öyrəndiklərini həyatına köçürürsən və görürsən ki, həyatının keyfiyyəti xeyli yaxşılaşır. Bu, əslində çox əlçatandır – sən sadəcə xalçanı açdın, məşq etdin və artıq səndə proses başladı: vəziyyətindən, enerjindən başqa düşüncələr yarandı, artıq başqa istəklər gəldi, istəklərdən başqa hərəkətlər gəldi, hərəkətlərdən xarakterin dəyişdi, xarakterdən bütün taleyin, həyatın dəyişir. Sən bundan artıq imtina edə bilmirsən.

- Vera, siz Sibirdə dünyaya gəlmisiniz. Başqa mədəniyyətdən, başqa ölkədən olan bir insan kimi Azərbaycan torpağının hansısa xüsusi enerjisi olduğunu hiss edirsinizmi?

- Mən həmişə özümə sual verirdim: mənim burada nə işim var, bura necə gəlmişəm? Çünki mən bura tamamilə möcüzəvi şəkildə gəldim - təsadüfən və ya heç təsadüfən deyil. Mənə elə gəlir ki, birincisi, bu torpağa çox sayda maraqlı insanlar axışır. Bəlkə də bu ona görədir ki, burada yerin altından od enerjisi gəlir... Burada qədim insanlar yaşayıb, bəlkə də hansısa kodlar qoyublar. İpək Yolu da buradan keçirdi və buraya Hindistandan ziyarətçilər gəlib və burada qədim Veda məbədləri var. Birmənalı olaraq, bu yerdə bir növ enerji mərkəzi var. Bəlkə də biz onun kəşfi ərəfəsindəyik.

Mənə elə gəlir ki, bu, od enerjisidir – o, fəaliyyətə, birliyə yönəlib. Burada bir növ “tayfa” mövzusu var. Mən görürəm ki, insanlar həqiqətən də bu spiralı bururlar, sanki biz yeni, böyük bir nəyinsə kəşfi ərəfəsindəyik. Buna görə də, bu enerjini toplamaq üçün daha çox məşq etmək lazımdır.

- Müasir insanların bütün dünyada rastlaşdıqları hər hansı bir ümumi problemi müəyyən edə bilərsinizmi? Yoqa bunu həll etməyə necə kömək edə bilər?

- İstehlak. Bizim beynimizə salıblar ki, bizə bir çox şey lazımdır. Biz bunu etməliyik, etməliyik, etməliyik! Bir yerə qaçmaq, daim bəzi məzmunlar paylaşmaq. İnsanlar isə tələsir, təlaşa düşürlər, onlar düşünürlər ki, nəsə almasam, nəyisə əldə etməsəm, harasa gecikdim, nəsə yeməsəm, o zaman aclıqdan, soyuqdan öləcəyəm, və ya başıma başqa bir şey gələcək... Amma əslində bu, illüziyadır, enerjimizi boş yerə sərf edirik.

Yoqa necə kömək edə bilər? Yoqada vücudun, ruhun, missiyalarınla çox güclü bir əlaqən yaranır, sən sadəcə olaraq çılpaq həqiqəti kəşf edirsən – özün haqqında, vücudun haqqında və bu heç də həmişə şirin olmur. Bir çox insanlar yoqaya gəldikdə bir yenilənmə, sıfırlanma yaşayır və bu, həmişə ağrı, göz yaşları, rədd edilmə, sövdələşmə, bir növ əzabdan keçməklə baş verir. Köhnədən qurtulub yeniyə gəlmək çətin prosesdir. Yoqa ilə məşğul olan insanlar isə köhnədən, köhnə vərdişlərindən, nümunələrindən, özləri ilə, dünya ilə münasibətlərindən çıxmağa başlayırlar və bu yolla özlərinə kömək edirlər. İnsanlar həyatlarını çox dəyişirlər. Yoqa sayəsində heç bir şəkildə dəyişməmiş bir insana hələ rast gəlməmişəm.

- Gündəlik həyat üçün bəzi sadə yoqa məsləhətləri verə bilərsinizmi ki, insan yoqa ilə məşğul olmasa belə, ondan istifadə edə və həyatının keyfiyyətini yaxşılaşdıra bilsin?

- Həftədə bir dəfə bir saat məşq etməkdənsə, hər gün 15 dəqiqə məşğul olmaq daha yaxşıdır. Bu, kiçik addımlar sənətidir və işə yarayır. Deyirlər ki, işin ən çətin tərəfi xalçada durmaqdır. Çünki bizim təlaşlı, böyük, sürətli dünyamızda insan bu 15 dəqiqəlik təcrübəni həyatına sığışdıra bilmir. Bu mənim üçün absurddur. Axı biz telefonda oturmağa vaxt tapırıq...

- Siz şaman təbabətinə toxundunuz. Bu fərqli bir mövzu olmasına baxmayaraq, mən soruşmaya bilmərəm, ev şəraitində edilə bilən sadə şaman praktikası varmı?

- Şamanlar nə deyirlər? Deyirlər ki, ünsürlərlə işləmək lazımdır. Bu, adi, orta statistik şəhər insanı üçün ən sadə şeydir. Məsələn, bir şam yandırmaq olar, şam üzərində meditasiya etmək olar, şama baxıb istəmək, ağlamaq olar - bu, oddur, o, hər şeyi yandırır, o, hər şeyə işıq saçır, o, isidir, bu, işıqdır, bu, istidir, bu, hər zaman “yüngülləşmədir”. Su ilə işləmək olar... Hava ilə əlaqə qurmaq.

Ünsürlərlə işləmək şamanın ən əsas, ən ilkin yoludur, çünki biz özümüz özümüzə şamanıq. Biz özümüz özümüzə şəfa verənlərik, daxilimizdə hər şey var. Yoqa ilə məşğul olanda da eyni şey baş verir. Sən sadəcə olaraq yenə də başa düşürsən ki, o şəfa verən, o həkim, o mənim daxilimdədir. Ən yaxşı dost, ən sevimli ana, ata, valideyn - hər şey məndədir: materiya da, Tanrı da, kainat da.