Vətən müharibəsi şəhidlərinin ailə üzvləri ilə görüş keçirilib
Bakı, 17 mart, AZƏRTAC
Martın 17-də Yeni Azərbaycan Partiyasının (YAP) Nəsimi rayon təşkilatının inzibati binasında 44 günlük Vətən müharibəsinə həsr edilmiş “Tariximizin şanlı Zəfər salnaməsi” adlı fotostend nümayiş olunub.
YAP-ın Nəsimi rayon təşkilatının mətbuat xidmətindən AZƏRTAC-a bildirilib ki, karantin qaydalarına əməl edilməklə partiyanın binasında rayon ərazisində yaşayan Vətən müharibəsi şəhidlərinin ailə üzvləri ilə görüş keçirilib. Görüşdən əvvəl xalqımızın ümummilli lideri Heydər Əliyevin və torpaqlarımızın suverenliyi, ərazi bütövlüyü uğrunda şəhid olan bütün soydaşlarımızın xatirəsi bir dəqiqəlik sükutla yad olunub.
YAP Nəsimi rayon təşkilatının sədri, Milli Məclisin deputatı Məlahət İbrahimqızı müstəqilliyimiz, suverenliyimiz və ərazi bütövlüyümüzün təmin edilməsi və qorunub saxlanması uğrunda canlarından keçən şəhidlərin xatirəsinin dövlətimiz tərəfindən hər zaman əziz tutulduğunu bildirib. Qeyd edib ki, şəhidlərin xatirəsi daim əziz tutulduğu kimi, onların ailə üzvləri, doğmaları da hər zaman dövlət qayğısı ilə əhatə olunublar. M.İbrahimqızı deyib: “44 günlük Vətən müharibəsi zamanı Prezident, Müzəffər Ali Baş Komandan İlham Əliyevin rəhbərliyi altında Azərbaycan Ordusu misilsiz Zəfər qazanaraq, öz şücaətini dünya hərb tarixinə qızıl hərflərlə yazdı. Bu, hər birimizdə milli qürur hissləri yaradır. Dövlətimizin başçısının dəfələrlə qeyd etdiyi kimi, torpaqlarımızın erməni işğalından azad edilməsində həyatını itirən şəhidlərimizin və sağlamlığını itirmiş qazilərimizin igidliyi bir rəşadət və qəhrəmanlıq salnaməsidir və onların hər birinə hörmət və ehtiram hər birimizin borcudur. Ölkəmizdə Qarabağ müharibəsində canlarından keçən şəhid ailələrinə yüksək dövlət qayğısı göstərilir və onların problemləri diqqətdə saxlanılır. Azərbaycan Prezidenti İlham Əliyevin yürütdüyü siyasətin əsas istiqamətlərindən biri də müharibə veteranlarının, əlillərin, şəhid ailələrinin sosial müdafiəsinin gücləndirilməsi, onların problemlərinin həll olunmasıdır”.
Tədbirdə iştirak edən şəhid ailələrinin üzvləri onlara göstərilən diqqət və qayğıya görə dövlətimizin başçısına minnətdarlıqlarını bildiriblər. Görüş çərçivəsində YAP Nəsimi rayon təşkilatının qərargah binasında Azərbaycan xalqının 44 günlük Vətən müharibəsinə və bu müharibədə qazanılan möhtəşəm Zəfəri əks etdirən “Tariximizin şanlı Zəfər salnaməsi” adlı fotostend nümayiş olunub. Fotostenddə “Müzəffər Ali Baş Komandan”, “Şəhidlər ölməz, Vətən bölünməz” adlı guşələr yaradılıb.
Bölmənin digər xəbərləri
