“VƏTƏNİN MÜDAFİƏSİNƏ HAZIRAM!” DEVİZİ İLƏ POLİATLON ÇOXNÖVÇÜLÜYÜ ÜZRƏ BAKI ŞƏHƏR ÇEMPİONATI KEÇİRİLMİŞDİR
Bakı şəhər Gənclər və İdman Baş İdarəsinin təşkilatçılığı ilə Azərbaycan Dövlət Bədən Tərbiyəsi və İdman Akademiyasının zalında və Daxili İşlər Nazirliyinin İdman Cəmiyyətində keçirilən yarışlarda paytaxtın 11 rayon komandasının heyətində 55 idmançı iştirak etmişdir. Gənclər 100 metr məsafəyə qaçışda, turnikdə dartınmada və güllə atıcılığında güclərini sınamışlar. Mükafata layiq yer tutan komandalar idmanın hər üç növü üzrə toplanan xalların cəminə görə müəyyən olunmuşdur.
Xətai rayonunun komandası 645 xalla birinci, Nərimanov rayonunun təmsilçiləri 573 xalla ikinci, Nizami rayonunun gəncləri 497 xalla üçüncü yer tutmuşlar. Şəxsi yarışlarda isə Orxan Ağadadaşov (Xətai) 146 xalla birinci, Nicat Əliyev (Nərimanov) 140 xalla ikinci, Vidadi Əliyev (Xətai) 138 xalla üçüncü olmuşlar.
İlk iki yeri tutan komandalar mayda keçiriləcək Azərbaycan çempionatında iştirak etmək hüququ qazanmışlar. Qeyd edək ki, bu yarışlar ildə iki dəfə, yaz və payız fəsillərində həqiqi hərbi xidmətə çağırış günlərində keçirilir.
Bölmənin digər xəbərləri
