Qax, 12 mart, Mustafa Dadaşov, AZƏRTAC

Azərbaycan ədəbiyyatı tarixində xüsusi yer tutan Aşıq Ələsgərin zəngin poetik irsi ölkəmizin bir çox aşıqları üçün əsl sənətkarlıq məktəbi olub. İstedadlı el sənətkarı öz yaradıcılığında aşıq şeirinin, demək olar, bütün janrlarına müraciət edib və hər birində böyük uğur qazanıb. Tükənməz xalq yaradıcılığı çeşməsindən süzülüb gələn bu təkrarsız sənət nümunələri xəlqiliyi, dil sadəliyi, üslub gözəlliyi, forma əlvanlığı ilə dinləyicinin, oxucunun zövqünü oxşayıb, insanlarda gözəl hiss və duyğuların baş qaldırmasına səbəb olub.

AZƏRTAC-ın bölgə müxbiri xəbər verir ki, bu fikirlər istedadlı el sənətkarı Aşıq Ələsgərin anadan olmasının 200 illiyi münasibətilə Qax rayon Mərkəzləşdirilmiş Kitabxana Sisteminin (MKS) və rayon Mədəniyyət Mərkəzinin birgə təşkilatçılığı ilə keçirilən “Haqq aşığı Aşıq Ələsgər” adlı videokonfransda səsləndirilib.

Onlayn formatda keçirilən tədbiri MKS-nin direktoru Güllü Əhmədova açaraq, Azərbaycan aşıq sənətinin görkəmli nümayəndəsi, qüdrətli söz ustadı Aşıq Ələsgərin 200 illik yubileyinin yüksək səviyyədə qeyd olunmasını təmin etmək məqsədilə Prezident İlham Əliyev tərəfindən bu il fevralın 18-də xüsusi Sərəncam imzalandığını və hazırda yubileylə bağlı silsilə tədbirlərin keçirilməsinə başlandığını diqqətə çatdırıb. Bildirilib ki, Heydər Əliyev Fondunun, eləcə də Mədəniyyət Nazirliyinin həyata keçirdiyi məqsədyönlü tədbirlərin nəticəsidir ki, Azərbaycanın aşıq sənəti də UNESCO-nun Qeyri-Maddi Mədəni İrs üzrə Reprezentativ Siyahısına daxil edilib.

Videokonfransda Şəki Regional Mədəniyyət İdarəsinin Qax rayonu üzrə nümayəndəsi Dilarə Əzizova, rayon Mədəniyyət Mərkəzinin direktoru Kəmalə Məcidova, kitabxana filiallarının və mədəniyyət evlərinin əməkdaşları çıxış edərək, Aşıq Ələsgərin yaradıcılığından, zəngin bədii irsindən, Azərbaycan poeziyasının inkişafına, aşıq şerinin zənginləşməsinə verdiyi töhfələrdən ətraflı söz açıblar.

Tədbirdə kitabxanaçıların ifasında Aşıq Ələsgərin qoşma, gəraylı, təcnis və digər janrlarda yazdığı şeirlər səsləndirilib.