Bakı, 25 aprel, AZƏRTAC 

Aprelin 25-də Bakı Konqres Mərkəzində Birləşmiş Millətlər Təşkilatının Sivilizasiyalar Alyansının VII Qlobal Forumu çərçivəsində biznes simpozium keçirilib.

AZƏRTAC xəbər verir ki, tədbirdə son illər Azərbaycanda iqtisadi sahədə həyata keçirilən islahatlar, reallaşdırılan regional layihələr, yoxsulluğun aradan qaldırılması, məşğulluğun təşkili və digər mühüm məsələlərə toxunulub.

Simpoziumda çıxış edən iqtisadiyyat naziri Şahin Mustafayev bildirib ki, əsrlər boyu milli, dini, irqi mənsubiyyətindən asılı olmayaraq insanların harmoniya içində yaşadığı və özünün tolerantlıq ənənələri ilə seçildiyi Azərbaycanda 2016-cı ilin “Multikulturalizm ili” elan edilməsi ölkəmizin bu ümumbəşəri dəyərlərə sadiqliyini bir daha nümayiş etdirir. Bu baxımdan hesab edirəm ki, BMT-nin Sivilizasiyalar Alyansının VII Qlobal Forumunun məhz Azərbaycanda keçirilməsi təsadüfi deyil.

Nazir vurğulayıb ki, inklüziv cəmiyyətin formalaşdırılması bəşəriyyət qarşısında duran ən önəmli çağırışlardandır. Son illər dünyada gedən proseslər, tolerantlıq ənənələrinin sarsılmaz hesab edildiyi bəzi ölkələrdə baş verən hadisələr məsələnin aktuallığını daha da artırır. Məhz bu səbəbdən qeyd edilən mövzu üzrə çoxlu sayda beynəlxalq tədbirlər keçirilir, cəmiyyətin müxtəlif təbəqələrinin, o cümlədən dövlət, elm, biznes və digər dairələrin nümayəndələrinin fəal iştirakı ilə aparılan müzakirələr ümumi istiqamətlərin müəyyənləşdirilməsinə xidmət edir. Buna görə, bu gün işinə başlayan biznes simpozium üçün “İnklüziv cəmiyyətdə birgə yaşamaq: özəl sektorun rolu və məsuliyyəti” mövzusu seçilib. Məlum olduğu kimi, inklüzivlik yoxsullar, fiziki və əqli qüsurlu şəxslər, qaçqın və məcburi köçkünlər, məhkumlar və cəmiyyətin digər həssas qrupları üçün gəlir və maddi nemətlər əldə etmək, sosial xidmətlərdən yararlanmaq imkanlarının artırılmasını, başqa sözlə, rifahının təmin edilməsini nəzərdə tutur.

Azərbaycanın iqtisadiyyat naziri deyib: “İnklüziv cəmiyyətlərin formalaşmasına həm hökumətlər, həm də biznes icması məsuliyyət daşıyır. Birgə məsuliyyət bu istiqamətdə fəaliyyətlərin əlaqələndirilməsini və səylərin birləşdirilməsini zəruri edir. Dünya ölkələri cəmiyyətin inklüzivliyini təmin etmək üçün müxtəlif inkişaf və sosialyönümlü layihələr icra edir. Belə layihələrə misal olaraq, yoxsulluq səviyyəsinin nisbətən yüksək olduğu regionlarda yeni iş yerlərinin yaradılmasını təmin edən investisiya layihələrinin icrası, fiziki və əqli cəhətdən qüsurlu şəxslərin cəmiyyətin tamhüquqlu üzvləri kimi təhsil əldə etməsi və işlə təmin olunması, gender tarazlığının formalaşması, dini, irqi və milli fərqlərindən asılı olmayaraq bütün vətəndaşlara bərabər imkanların yaradılmasına yönəlmiş layihələri qeyd etmək olar.

Nazir deyib ki, bu gün Cənubi Qafqaz regionunun inkişafında ən böyük maneə olan Ermənistan-Azərbaycan, Dağlıq Qarabağ münaqişəsi nəticəsində ərazilərinin 20 faizi Ermənistan tərəfindən işğal olunmuş və 1 milyondan çox qaçqın və məcburi köçkünü normal həyat şəraiti ilə təmin etmək problemi ilə üzləşən Azərbaycan bu problemin nə qədər ağır olduğunu və onun həllinin nə qədər böyük səylər tələb etdiyini aydın anlayır. Ölkəmiz bu məqsədlərə böyük vəsaitlər yönəltməklə bərabər, beynəlxalq təşkilatlarla da sıx əməkdaşlıq edir. Yeri gəlmişkən, bildirmək istərdim ki, BMT strukturlarının dəstəyi ilə Azərbaycanda inklüziv cəmiyyətin formalaşması, o cümlədən qaçqın və məcburi köçkünlərin, əlillərin, qadınların və digər həssas qrupların rifahının yüksəlməsinə yönəlmiş layihələr icra olunub.

Şahin Mustafayev vurğulayıb ki, yoxsulluğun aradan qaldırılmasının ən səmərəli yolu kimi layiqli iş yerlərinin yaradılmasında özəl sektorun rolu danılmazdır. Bir sıra beynəlxalq qurumların hazırladığı hesabatlara əsasən inkişaf etməkdə olan ölkələrdə iş yerlərinin təqribən 90 faizi məhz özəl sektor tərəfindən təmin edilir. Buna görə, özəl sektorun bu funksiyanı yerinə yetirə bilməsi üçün hökumətlər əlverişli biznes və investisiya mühiti yaratmalı, sahibkarlığın inkişafı üçün müxtəlif təşviq tədbirləri tətbiq etməlidirlər. Beynəlxalq yardım proqramları da əsasən əlverişli biznes mühitinin yaradılmasına istiqamətlənməlidir. Bu baxımdan, Azərbaycanda biznes mühitinin yaxşılaşdırılması, şəffaf inzibati tənzimləmə və dəstək mexanizmlərinin tətbiqi, layihələrin birgə maliyyələşdirilməsi və risklərin bölüşdürülməsi və digər sahələrdə uğurlu təcrübə mövcuddur. Belə ki, son 10 il ərzində ölkəmizdə təqribən 1,5 milyon iş yeri açılıb, işsizliyin səviyyəsi 5 faizə, yoxsulluğun səviyyəsi isə təxminən 8 dəfə azalaraq 4,9 faizə enib. Biz məmnuniyyətlə bu təcrübəmizi bölüşməyə hazırıq.

Özəl sektorun bu sahədəki fəaliyyət istiqamətlərinə gəldikdə hesab edirik ki, layihələr əhalinin yoxsul və müdafiəyə ehtiyacı olan təbəqələrini əmək fəaliyyətinə daha çox cəlb etməli, iri investisiya layihələri daha çox yoxsul əhalinin məskunlaşdığı ərazilərdə cəmiyyətin bütün üzvlərinin rifahına xidmət edəcək tərzdə həyata keçirilməlidir. Bu zaman aşağı ixtisaslı iş yerlərinin yaradılmasına diqqət verilməli, qeyri-hökumət və donor təşkilatlarla sıx əməkdaşlıq edilməlidir.

Tədbirdə çıxış edən BMT-nin Sivilizasiyalar Alyansının ali nümayəndəsi Nasir Əbdüləziz Əl-Nasir deyib ki, qlobal iqtisadi problemlərin, yoxsulluğun aradan qaldırılması bir ölkənin səyi nəticəsində mümkün olan məsələ deyil. Bunun üçün birlikdə mübarizə aparmalıyıq. Biz mütərəqqi inkişaf proqramının reallaşdırılması üçün əlimizdən gələni etməliyik. BMT 2010-cu ildən başlayaraq yoxsulluğun aradan qaldırılması istiqamətində mühüm işlər, layihələr və proqramlar həyata keçirməkdədir.

Hazırda dünyanın qaçqın böhranı ilə üzləşdiyini söyləyən ali nümayəndə bildirib ki, bu, II Dünya müharibəsindən sonra dünyanın üzləşdiyi mühüm problemlərdəndir. Bunun həlli yubanmamalı, müharibələr dayandırılmalıdır. Dünyada artan siyasi, iqtisadi problemlər universal bəşəri səviyyədə öz həllini tapmalıdır.

Nasir Əbdüləziz Əl-Nasir deyib: “Biz Alyansın VII Qlobal Forumunda daha irəli addımlar atacağımıza əminik. Bu Forum böyük anlaşma və əlaqə yaratmaq üçün əhəmiyyətli platformadır. Bu, həmçinin sülh və təhlükəsizliyin təbliği üçün yeni perspektivlər vəd edir. Mədəni müxtəliflik incəsənət vasitəsilə daha geniş yayılır. Forum çərçivəsində keçirilən ideyalar yarmarkası və gənclər sərgisi buna çox gözəl nümunədir. BMT dialoqun sülh üçün gözəl vasitə olduğunu təşviq edir. Müxtəlifliyi təbliğ etmək, fikir azadlığı, bir-birini yaxından tanımaq, tolerantlıq, qarşılıqlı anlaşma, digərinə hörmət bizim BMT-də işimizin əsasını təşkil edir”.

Ali nümayəndə vurğulayıb ki, BMT-nin 2025-ci ildən sonrakı İnkişaf Proqramını birlikdə reallaşdırmalıyıq. Bu işin müsbət həlli inklüziv cəmiyyətlərin formalaşmasına təkan verəcək.

Biznes simpoziumun açılış mərasimindən sonra panel müzakirələrə başlanılıb. Panel iclasın moderatoru “Euronews Washington”un müxbiri Stefan Qrob məruzəçilər haqqında məlumat verib, Forumda müzakirə edilən məsələlərin əhəmiyyətindən söz açıb.

“BMW Group” şirkətinin vitse-prezidenti Bill McAndrevs Bakıya səfərindən şad olduğunu bildirərək BMW şirkətinin müxtəlifliyi özündə əks etdirdiyini vurğulayıb. Bildirib ki, şirkət inklüziv cəmiyyəti, birgəyaşayışı uğurun açarı kimi görür, fəaliyyətlərində korporativ vətəndaşların hansı yenilikləri, onların nə görmək istədiyini dəyərləndirir. Bu cəhətdən də dünyanın müxtəlif ölkələrində nadir tərəfdaşlıqlar həyata keçirilir. Şirkətin digər fəaliyyət istiqamətlərindən biri də gənc liderlərin yetişdirilməsi, püxtələşdirilməsidir. Bu, həmin liderlərin yaşadığı cəmiyyət üçün də üstünlüklər vəd edir. Şirkətin Münxendə yerləşən ofisində mədəniyyətlərarası dialoqu öyrənmə qrupu yaradılıb.

“Orange Horizons” şirkətinin nümayəndəsi Sebastien Krozier “Kommunikasiya sahəsində inklüziv cəmiyyətin rolu” mövzusunda məruzə ilə çıxış edib. O, şirkət haqqında məlumat verdikdən sonra bildirib ki, təşkilat 20 ölkədə fəaliyyət göstərir. Bu ərazi əsasən Afrika və yaxın Şərqi əhatə edir. Nümayəndə bu ərazilərdə çətinliklərin mövcudluğunu nəzərə çatdırıb. Qeyd edib ki, bu ölkələrdə təhlükə və çağırışlar həddindın artıq çoxdur. Əsasən mobil telefondan istifadə edən insanlar sosial şəbəkələr vasitəsilə yeni əlaqə növləri yaradır, bilik və mədəniyyətlərini paylaşırlar. Bu da yeni cəmiyyətləri və yeni cərəyanları formalaşdırır. Korporativ sosial mənsubiyyət bu cəhətdən vacib amil sayıla bilər. Bu amil insanları birləşdirir, əlaqələrin yaranmasına səbəb olur. Əsas isə budur ki, insanlar arasında mədəni məqamların paylanmasına imkan yaranır.

“CEO Falcon Equity Group” şirkətinin nümayəndəsi Holger Heims insanların daha açıq şirkətlərə üstünlük verdiyini diqqətə çatdırıb. Dünyada transmilli şirkətlərin BMT-nin Sivilizasiyalar Alyansında iştirak hüququ qazandığını nəzərə çatdıran məruzəçi yaxın gələcəkdə kiçik şirkətlərin də bu sıraya qoşulması üçün müəyyən addımların atılmasının vacibliyini vurğulayıb. Daha sonra məruzəçi Almaniyada miqrantların işlə təmin edilməsi problemi haqqında fikirlərini bölüşüb.

“Airbus Group International” şirkətinin vitse-prezidenti Silvere Delaunay məruzəsində diqqəti dünyanın müxtəlif aviaşirkətlərinin, təyyarə istehsalçılarının inklüziv cəmiyyətlərdə birgəyaşayışla bağlı çağırış və məqsədlərə cəlb edilməsinə yönəldib. Bildirib ki, Bakı Forumu bir çox problemlərin həllini ehtiva edəcək. Bu gün aviasiya sahəsində müxtəlif növ ekstremizmə, zorakılığa rast gəlinir. Bizim çalışdığımız sahədə mədəni müxtəliflik bu halların qarşısının alınmasına müsbət təsirini göstərə bilər.

Panel müzakirələrin sonuncu məruzəçisi Sülh Naminə Guerrand-Hermes Fondunun baş katibi Skerto Gill sülhün bir anlayış olaraq ədalətliliyi və müxtəlifliyi ehtiva etdiyini dilə gətirərək deyib ki, millətlərarası dostluq bir öhdəlik, fədakarlıqdır. İnsanlıq mədəni müxtəlifliyi təqdir etməli, mənəvi dəyərlərə rəğbətlə yanaşmalıdır. İnsanlar dialoqlara açıq olmalıdırlar ki, bəşəri meyarlara nail olsunlar. Yekunda isə bu məqam icmaların zənginləşməsinə gətirib çıxarır.

Məruzələr zamanı insanların bərabər gəlirləri problemi ətrafında müzakirələrə də yer ayrılıb. Məruzəçilər dünyada insanların gəlirlərinin bərabərləşməsi prosesinə diqqətin artırılması fikirlərini irəli sürüblər.

Biznes simpozium günün ikinci yarısında əməkdaşlıq toplantıları ilə davam edib.