“Vikipedia”nın özbək dilində olan versiyasında Azərbaycan Xalq Cümhuriyyəti adlı bölmə istifadəyə verilib
Daşkənd, 8 may, АZƏRTAC
“Vikipedia” Beynəlxalq Elektron Ensiklopediyasında özbək dilində olan versiyasında Azərbaycan Xalq Cümhuriyyəti adlı bölmə istifadəyə verilib.
AZƏRTAC xəbər verir ki, bölmədə Azərbaycan Xalq Cümhuriyyəti haqqında ətraflı məlumat verilir, Cümhuriyyətin yarandığı tarixi şərait və süqutu haqqında danışılır.
Bildirilir ki, Azərbaycan Xalq Cümhuriyyəti Azərbaycan xalqının Çar Rusiyasına qarşı milli azadlıq mübarizəsi nəticəsində, Birinci Dünya müharibəsi dövründə Şimali Azərbaycanda yaranıb və Müsəlman Şərqində ilk parlament respublikası olub.
Bölmədə xarici ölkələrin Azərbaycan Xalq Cümhuriyyətində olan nümayəndəlikləri, onun ordusu, inzibati bölgüsü və iqtisadiyyatı haqqında müfəssəl məlumat verilir. Cəmi iki ilə yaxın müddətdə mövcud olan Cümhuriyyətdə nəqliyyat, demoqrafiya, təhsil, səhiyyə, təsviri sənət, memarlıq, musiqi, ədəbiyyat, mətbuat sahələrində görülmüş işlər təqdim olunur.
Materialda Cümhuriyyətin nazirləri haqqında da ayrı-ayrılıqda məlumat verilir.
Qeyd edək ki, layihə Daşkənddəki Heydər Əliyev adına Azərbaycan Mədəniyyət Mərkəzinin informasiya təminatı ilə həyata keçirilir.
Qulu Kəngərli
AZƏRTAC-ın xüsusi müxbiri
Daşkənd
Bölmənin digər xəbərləri
