Vilnüs Gediminas Texniki Universitetinin nümayəndə heyəti BMU-da olub
Bakı, 23 oktyabr, AZƏRTAC
Litva Respublikasının Vilnüs Gediminas Texniki Universitetinin (VILNIUS TECH) nümayəndə heyəti ilə Bakı Mühəndislik Universitetində (BMU) görüş keçirilib.
BMU-dan AZƏRTAC-a bildirilib ki, qonaqlara universitetin fəaliyyəti, beynəlxalq əlaqələri barədə məlumat verən rektor Yaqub Piriyev çıxışında Azərbaycan dövlətinin gənclərin xaricdə təhsilinə də xüsusi diqqət göstərdiyini bildirib və bu istiqamətdə Prezident İlham Əliyevin sərəncamları ilə icra olunan dövlət proqramlarını diqqətə çatdırıb. Tam dövlət təqaüdlü proqramlar sırasında BMU və Cənubi Koreyanın İNHA Universiteti arasında həyata keçirilən ikili diplom proqramı barədə danışan rektor Çin universitetləri ilə də bu istiqamətdə başlanılan yeni ikitərəfli layihələrə toxunub. Rektor BMU-nun son illər beynəlxalq tərəfdaşlıq siyasətini fəal şəkildə inkişaf etdirdiyini və Avropa təhsil məkanında tanınan ali məktəblərlə də sıx əməkdaşlığa böyük önəm verildiyini deyib. BMU-nun beynəlxalq əməkdaşlıq vasitəsilə yeni təcrübə mübadiləsinə açıq olduğunu önə çəkən Yaqub Piriyev Baltikyanı ölkələrin nüfuzlu ali təhsil ocaqlarından olan VILNIUS TECH ilə əməkdaşlığın tədris və elmi-tədqiqat fəaliyyətinin keyfiyyətinə müsbət təsir göstərəcəyinə inamını ifadə edib.
Nümayəndə heyəti adından çıxış edən VILNIUS TECH-in professoru Dalius Mazeika universitet haqqında təqdimat edib. Bildirib ki, təmsil etdiyi universitet mühəndislik, texnologiya, tətbiqi elmlər və innovasiya sahələrində aparıcı dövlət ali təhsil müəssisələrindən biridir. Universitet ağıllı şəhərlər, yaşıl enerji, robot texnologiyaları, aviasiya sistemləri, nəqliyyat mühəndisliyi və informasiya texnologiyaları istiqamətlərində elmi-tədqiqat layihələri həyata keçirir.
Görüşdə elmi əməkdaşlığın gücləndirilməsi, mübadilə və ikili diplom proqramları, eləcə də birgə tədqiqat təşəbbüsləri yönündə müzakirələr aparılıb.
Səfər çərçivəsində nümayəndə heyəti BMU-nun kampusu, laboratoriyaları və elmi-tədqiqat mühiti ilə tanış olub.
Sonra nümayəndə heyəti üzvlərinin iştirakı ilə BMU-nun SABAH proqramının tələbələri üçün seminar və infosessiya təşkil olunub. Tədbirlərdə universitetin professoru Vidas Zuraulis “Mühəndislikdə AI - nəqliyyat mühəndisliyi” mövzusunda çıxış edib. Həmçinin professor Dalius Mazeika, Beynəlxalq Tədris Mərkəzinin baş meneceri Viktorija Pliuskiene və Aloha Vorld xaricdə təhsil şirkətinin direktoru Səbuhi Ağayev tərəfindən Litvada təqaüdlü təhsil imkanlarına dair təqdimatlar edilib. Görüşlərdə, həmçinin tələbələrə VILNIUS TECH-də tədris olunan ixtisaslar, yataqxana, təqaüd proqramları, tələbə həyatı, viza və yaşayış icazəsi, həmçinin qəbul şərtləri haqqında geniş məlumat verilib, tələbələri maraqlandıran suallar cavablandırılıb.
Bölmənin digər xəbərləri
