Vitse-prezident: Ağırlıqqaldıranlarımız Avropa çempionatında ümidləri doğrultdular
Bakı, 6 noyabr, AZƏRTAC
Ağırlıqqaldırma üzrə Azərbaycan millisi Albaniyanın Dürres şəhərində keçirilən Avropa çempionatında yüksək nəticələrlə yadda qaldı.
AZƏRTAC xəbər verir ki, Ravin Alməmmədov (79 kiloqram) birdən qaldırmada bürünc, təkanla qaldırmada qızıl medala sahib çıxaraq toplamda Avropa birinciliyinin qalibi olub.
Birdən və təkanla qaldırma hərəkətlərinin icrasında 2 gümüş mükafata yiyələnən Tehran Məmmədov (64 kiloqram) isə toplamda da fəxri kürsünün ikinci pilləsinə yüksəlib.
Azərbaycan Ağırlıqqaldırma Federasiyasının vitse-prezidenti Firdovsi Umudov bildirib ki, idmançılar onlara bəslənən ümidləri doğruldublar: “Bildiyiniz kimi Avropa birinciliyində gənclərin yarışında sonuncu dəfə 10 il əvvəl qızıl medal qazanmışdıq. Ravin bu uğuru təkrarlamaqla yanaşı, Avropa birinciliyinin rekordunu da müəyyənləşdirdi və bu federasiya olaraq doğru yolda olduğumuzun göstəricisidir”.
O, yarış zamanı Ermənistan idmançısının fəxri kürsüdəki davranışları ilə bağlı suallara da aydınlıq gətirib: “Əvvəla onu bildirim ki, biz hər zaman idmançılarımıza, xüsusən də gənclərə hər hansı təxribat xarakterli davranışlara uymamağı aşılayırıq. Mükafatlandırma mərasimində erməni atletin idmançı etikasına zidd hərəkətinin müqabilində biz soyuqqanlı davranış nümayiş etdirdik. Mükafatlandırma mərasimi bitən kimi yarışın təşkilat komitəsinə narazılığımızı bildirdik. Ədalət naminə deməliyik ki, mərasimdən sonra Ermənistan Ağırlıqqaldırma Federasiyası rəhbərlik səviyyəsində bizi təbrik etdi və baş vermiş hadisəyə görə üzrxahlığını ifadə etdi. Bununla belə Dövlət və onun rəmzlərinə münasibətdə səhv davranışa güzəşt edə bilmərik. Tərəfimizdən Avropa Ağırlıqqaldırma Federasiyasının rəhbərliyi və yarışın müvafiq komitəsinə baş vermiş hadisə ilə bağlı narazılığımızı əvvəlcə şifahi, daha sonra yazılı formada bildirdik. Azərbaycan Ağırlıqqaldırma Federasiyasının prezidenti Kamran Nəbizadə məsələyə dərhal reaksiya verdi və Avropa Ağırlıqqaldırma Federasiyası rəhbərliyinə rəsmi məktub ünvanlandı”.
Vitse-prezident bu məsələ barədə ədalətli qərar veriləcəyinə və oxşar halların təkrarlanmayacağına inandığını deyib: “Bir daha qeyd etmək istəyirəm ki, bizim təmsil olunduğumuz heç bir yarışda Azərbaycanın adına, Dövlət rəmzlərinə xələl gətirilə bilməz. Azərbaycan və Ermənistan arasındakı bütün suallara 5 il öncə aydınlıq gəldi və biz indi sülhə doğru addımlayırıq. Fürsətdən istifadə edib qarşıdan gələn Zəfər Günü münasibətilə xalqımızı təbrik edirəm. Qoy bayrağımız hər zaman ucalarda dalğalansın”.
Ravin Alməmmədov isə nəticədən dolayı sevincli olduğunu vurğulayıb: “Federasiya rəhbərliyinə və məşqçilərimə minnətdarlığımı bildirmək istəyirəm. Mənim qələbəmdə onların zəhməti böyükdür. Rəqibin kimliyi mənim üçün əhəmiyyət daşımır. Məqsədimiz qələbə qazanmaq idi və bunu bacardım. İnanıram ki rəqiblərim üçün müəyyənləşdirdiyim rekordu yeniləmək elə də asan olmayacaq”.
Tehran Məmmədov bu yarışa çox ciddi hazırlaşdığını deyib: “Ötən Avropa birinciliyindəki səhvlərimizdən doğru nəticələr çıxardıq və vətənə medallarla qayıtdıq. Başa düşürük ki, daha çox çalışmaq lazımdır. Bu idman növündə daim inkişaf dinamikası olmalıdır. Rəqiblər də ciddi hazırlaşır, yerimizdə saya bilmərik. Çalışacağam ki, böyüklərin də yarışında fəxri kürsüdə yer alım”.
Bölmənin digər xəbərləri
